Според Изет Меџити, кој се спомнува како можен носител на листата на ДУИ во првата изборна единица, потегот на СДСМ и на Беса е во спротивност со албанските интереси
Додека социјалдемократите го промовираат како историски договорот за коалицирање што вчера го склучија со Беса, нивните досегашни партнери од ДУИ сметаат дека новата предизборна коалиција значи свесна дефакторизација на албанскиот глас.
„Вчера, наместо да честитаме за големиот сојуз на малите албански партии, за жал, констатиравме повторна и свесна дефакторизација на албанскиот глас од овие партии. Изразуваме жалење за неуспехот за обединување на малите албански партии кои не успееја да се соединат поради лични интереси“,
изјави на денешната прес-конференција Изет Меџити, член на раководството на ДУИ и поранешен градоначалник на Чаир, алудирајќи на тоа дека Беса претходно не постигна договор за коалицирање со Алтернатива и со Алијансата за Албанците.
Според Меџити, кој се спомнува како можен носител на листата на ДУИ во првата изборна единица, потегот на СДСМ и на Беса е во спротивност со албанските интереси. Тој додаде дека претопувањето на Беса во т.н. сојуз со СДСМ е нивен партиски интерес и одлука на раководството на овие партии.
„При вчерашната најава на сојузот и во постојаниот наратив на македонските политички партии се зборува за условување на ДУИ кон македонските партии за правата на Албанците. Двете македонски партии не се разликуваат и велат дека нема да се дозволи уценување на коалицирањето од страна на ДУИ, уценување за правата на Албанците. Затоа бараат гласови од граѓаните, за да не бидат уценувани од ДУИ. Освен што ги бараат гласовите на Македонците, тие бараат и албански партнер за да не дозволат уценување“,
заклучи Меџити.
Тој ја нарече Беса „албанска маргинална партија“ која, според него, се стопила во наративот за спречување на уценувањето кон македонските партии од страна на Албанците. А тоа „уценување“, како што рече, е за неселективна правда, за нови работни места за Албанците, за економски развој на албанските региони…
„Да, вистина е. Ние ги условувавме македонските партии за промена на името на државата, за промена на Уставот, за да станеме дел од НАТО и од ЕУ, за да имаме двојазична држава, за да имаме претседател на Собранието Албанец, за да постигнеме договор со Бугарија, за ветинг, за работни места за Албанците, за унапредување на администрацијата… Ова наше условување ја донесе нашата земја во НАТО, на прагот на ЕУ и на прагот на целосната етничка рамноправност“,
рече Меџити.
Тој оцени дека „ова прогресивно условување ги натерало македонските партии да бараат и да најдат маргинална албанска партија која жедна за власт прифаќа безусловна коалиција“.
„Ние, како најголема албанска партија и гарант на Охридскиот, Преспанскиот и Договорот за добрососедство, имаме задача да ги заштитиме правата на Албанците. Затоа не може да има влада во ова земја без албанскиот победник на демократски избори. Албанскиот претставник во Владата го определува волјата на Албанците, а не волјата на сојузите и канцелариите“,
заклучи Меџити.
Заев, пак, денеска им порача на досегашните партнери во Владата да не се залажуваат бидејќи, како што рече, коалицијата СДСМ-Беса значи нов квалитет на политичката сцена и таа ќе победи на изборите.
*Поврзани вести: Заев до ДУИ: Да не си го лажете паметот, коалицијата СДСМ-Беса ќе победи во шестката
Вчера и вицепремиерот за европски прашања Бујар Османи, на прес-конференција во седиштето на ДУИ во Чаир, оцени дека коалицијата меѓу СДСМ и Беса е во спротивност на интересите на Албанците во земјава.
*Поврзани вести: Заев и Касами си дадоа „беса“ за заеднички настап на изборите – контра Мицкоски и Ахмети
По осумгодишно партнерство во Владата меѓу Али Ахмети и Никола Груевски, СДСМ и ДУИ, по последните избори во 2016 година, ја обновија коалицијата, која функционираше и во периодот 2002-2006 година. Иако СДСМ тогаш освои два мандата помалку од ВМРО-ДПМНЕ, ДУИ го наруши принципот на коалицирање „победник со победник“ што самата го наметна, така што беше постигнат договор за ново сојузништво на Ахмети со Заев.
*Поврзани вести: Го модификува ли ДУИ принципот „победник со победник“?
Опструкциите што тогаш ги приредуваше ВМРО-ДПМНЕ за да спречи смена на власта го одолговлекоа за повеќе месеци изборот на Талат Џафери на чело на парламентот, а со тоа и изборот на новата влада на СДСМ и на ДУИ. Старо-новите партнери потоа заедно настапуваа на локалните избори во 2017 година, како и на ланските претседателски избори, а во меѓувреме и во кампањата пред референдумот за името во 2018 година.
По завршувањето на претседателските избори, периодично почнаа да излегуваат на површина првите поголеми несогласувања меѓу СДСМ и ДУИ. Во последните месеци пред распишувањето на изборите, партнерите во Владата имаа несогласувања во врска со предложената промена на изборниот модел, односно воведувањето на една изборна единица, кога ДУИ со илјадници амандмани ја блокираше постапката за измена на Изборниот законик. Непосредно пред распуштањето на парламентот, на што му претходеше донесувањето на Законот за јавно обвинителство, функционери на СДСМ испратија вербални пораки до ДУИ дека е можно формирање ново парламентарно мнозинство, што во тој момент ќе значеше и „суспендирање“ на политичкиот договор за вонредни избори во април и пролонгирање на годинешните изборите до редовниот термин.
*Поврзани вести: ДУИ и ВМРО-ДПМНЕ не можат сами да го распуштат Собранието