Коалицијата меѓу СДСМ и Беса, а не ДУИ, ќе биде победник во изборната единица 6, рече лидерот на СДСМ, Зоран Заев, на денешната прес-конференција, прашан за коментар околу ставот на ДУИ дека коалицијата треба да се прави по принципот победник со победник во етничкиот блок, откако СДСМ и Беса вчера објавија заеднички настап на изборите.
„Јас би му порачал на нашиот сегашен коалициски партнер да не си го лаже паметот, коалицијата СДСМ-Беса и другите партии ќе биде победник на овие избори, не ДУИ. И тоа во 6. изборна единица каде што најмногу се мерат влијанието на втората етничка заедница по големина во државата, на албанската“,
рече Заев на прес-конференцијата на која промовираше мерки од економската програма за изборите.
Сепак, тој рече дека треба сериозно да се земат предвид коментарите на нивниот актуелен владин партнер бидејќи она што СДСМ и Беса го направиле вчера е продолжение на еден нов квалитет што се создава од 2016 година наваму, кога, како што рече, десетици Албанци гласаа за СДСМ, а потоа на локалните избори Македонци гласаа за кандидат за градоначалник од албанска партија, додека на претседателските избори се гласаше за независен кандидат.
„Во основата ни се граѓаните, а не нивната припадност, без разлика дали е етничка или партиска. Разноликоста не ни е од сега и видовме дека ниту ја згрозија ВМРО-ДПМНЕ и ДУИ во тој 11-годишен период наназад. Денес можеме да се пофалиме дека испишавме страница со мултиетничка коалиција од секој аспект“,
рече Заев.
На прашање како овој потег ќе влијае врз гласачите од македонската етничка заедница, Заев рече дека е уверен оти Македонците се уште повеќе мотивирани да гласаат за победникот кој се дистанцирал од етнички предрасуди и изградил единство.