Претседателот на Собранието Талат Џафери вчера на седницата за законот за Јавно обвинителство предложи за денеска одржување на лидерска средба на која, како што рече, ќе се потврди желбата на сите партии за одржување на изборите на 12 април. Тој претходно ја одложи седницата на која треба да се расправа за предлог законот за ЈО и за измени на Законот за Советот на јавни обвинители бидејќи се пријавиле повеќе од 30 говорници, но и поради тоа што пратениците цел ден му се жалеле дека биле преморени од чекање.
Џафери синоќа во 22 часот ја почна седницата на која треба да се расправа за предлог законите за Јавно обвинителство и за Советот на јавни обвинители и по кратко време ја прекина и ја презакажа за денеска во 11 часот.
Двотретинско мнозинство е потребно за законот за ЈО, кој не е официјален услов за добивање датум за почеток на преговори со ЕУ, но сепак од високите европски претставници се споменува како позитивен сигнал кој би можел да го придвижи процесот.
Пред да ја презакаже седницата Џафери им се обрати на пратениците во врска со пораки кои ги примал преку Фејсбук и повика во текот на денешниот ден да се одржи лидерска средба во врска со како што рече ново парламентарно мнозинство во контекст на одржување на изборите.
„Се додека примам пораки дека има можност да се создаде друго мнозинство дека ќе биде поуспешно, јавно ги повикувам партиските лидери доколку сериозно мислат дека имаат потреба да создадат друго мнозинство, јавно ќе организирам преку мојата покана во текот на утрешниот ден да имаме лидерска средба согласно Пржинскиоит договор, согласно договорот за предвремените избори од 12 април, да потврдиме дека има желба да се одржат изборите на 12 април“, истакна Џафери.
Една од пораките на која тој алудираше е онаа на генералниот секретар на СДСМ Љупчо Николовски кој им испрати порака на ДУИ и на ВМРО-ДПМНЕ дека, ако ги кочат процесите, може да не дојде до распуштање на парламентот и да пропаднат вонредните избори.
„Доколку во Собранието се продолжи со тактизирање и ако на било кој начин се оневозможи гласање на важните законите, а особено законот за јавно обвинителство, Изборниот законик, законот за одбрана, разрешувањето на Мизрахи…во тој случај постои реална можност ние да направиме ново парламентарно мнозинство, а потоа и нова стабилна влада која ќе организира редовни парламентарни избори“, изјави Љупчо Николовски, во гостувањето на телевизија 21.
Лидерот на ВМРО-ДПМНЕ Христијан Мицкоски пак вчера на емисија на телевизијата „Алфа“ рече оти е убеден дека на 12 април ќе има предвремени избори, а ако Собранието не се распушти до недела, според него ќе настапи сериозна политичка криза. Мицкоски рече дека во Собранието се вршел пазар за да се обезбеди двотретинско мнозинство за предлог законот за јавно обвинителство.
За денеска во 15 часот е закажана седница за разрешување на техничката министерка за труд и социјална работа, Рашела Мизрахи, што го побара премиерот Оливер Спасовски. За в недела на 16 февруари е закажана седница распуштање на Собранието.
*Поврзани вести
Зекири: ДУИ и ВМРО-ДПМНЕ ја обновија нивната криминална коалиција
Груби: Ги поддржуваме законите, политичка непредвидливост е неодржлива за земјава