Црногорската влада во заминување ја поздрави одлуката на Србија да не го протера црногорскиот амбасадор Тарзан Милошевиќ, иако претходно Белград ја најави таа мерка како реципроцитет на одлуката на црногорските власти.
Иако го поздрави тоа што официјален Белград ја повлече одлуката, Подгорица соопшти дека тие нема да ја повлечат одлуката за протерување на српскиот амбасадор во Подгорица, Владимир Божовиќ.
Црногорското Министерство за надворешни работи оцени дека секако немало причина да биде протеран црногорскиот амбасадор Милошевиќ.
„Амбасадорот Тарзан Милошевиќ ја претставува својата земја, притоа почитувајќи ја Република Србија, не се меша во нејзините внатрешни работи, се однесува со воздржаност кон земјата домаќин дури и кога Црна Гора беше грубо навредувана и понижувана од разни адреси во Србија, црногорските државни симболи беа осквернавени, и затоа реагираше и на разни меѓународни адреси“,
соопшти црногорското МНР.
Црногорската влада, која заминува од власт на 2 декември, кога во парламентот ќе биде избран новиот мандатар Здравко Кривокапиќ, во соопштението вели дека, за разлика од Тарзан Милошевиќ, српскиот амбасадор континуирано се меша во внатрешните работи на Црна Гора со своите интерпретации на историјата. Досегашната опозиција, која сега треба да ја преземе власта, пак, не се согласи со одлуката на владата во заминување.
Еврокомесарот за проширување Оливер Вархеји претходно го поздрави тоа што Белград се повлече од протерување на црногорскиот амбасадор и рече дека очекува тоа да го направи и Подгорица. Меѓутоа, тоа не се случи, а црногорското МНР му забележува на Вархеји дека при поздравувањето на српската одлука пропуштил со партнерите и пријателите во Црна Гора „барем да размени информации и мислења за меритумот на нештата“.
Спорот помеѓу Србија и Црна Гора настана поради различни толкувања на историско прашање поврзано со Подгоричкото собрание од 1918 година. Досегашната црногорската власт го сметаше тоа за нелегитимно, а во 2018, пак, донесе и закон со кој ги поништи сите одлуки на тоа собрание. Протераниот српски амбасадор, пак, во последната изјава посочи дека одлуката на тоа собрание за соединување кон Кралството СХС била ослободување на Црна Гора и ја одразила слободната волја на црногорскиот народ.
По ова, од црногорското МНР одлучија да го протераат бидејќи и досега амбасадорот неколкупати бил предупредуван.
Според црногорското МНР, амбасадорот Божовиќ во петокот нелегалното и нелегитимно го нарекол Подгоричко собрание од 1918 година ослободително и слободна волја на црногорскиот народ, со што уште еднаш, на најдиректен начин ја омаловажил државата која му пружи дипломатско гостопримство.
Во соопштението Подгорица истакна дека Божовиќ на таков начин го понижил законодавното и претставничко тело – Собрание на Црна Гора, кое на 29 ноември 2018 година усвои Резолуција за поништување на одлуката на Подгоричкото собрание, со која беше укинат дотогашниот суверенитет на Црна Гора, а нејзината територија соединета кон Кралството Србија и насилно беше детронизиран кралот Никола Петровиќ Његош.