Новиот лидер на СДСМ постигна убедлива предност пред своите двајца противкандидати, но, во споредба со претходните директни избори во партијата, што се одржаа пред само девет месеци, поддршката што тој ја доби од вкупното гласачко тело на СДСМ не е толку уверлива
Незадоволството на дел од членството поради оставката на Заев не се смета за единствена причина за апстиненцијата на дел од партиските избирачи, со оглед на тоа што пад во поддршката за СДСМ и колаицијата беше евидентиран и на локалните избори, во споредба со ланските парламентарни
Димитар Ковачевски, новиот претседател на СДСМ, очекувано постигна убедлива предност пред своите двајца противкандидати на вчерашните внатрепартиски избори, Јован Деспотовски и Фросина Ременски. Но, во споредба со претходните директни избори во партијата, што се одржаа пред само девет месеци, поддршката што тој ја доби од вкупното гласачко тело на СДСМ неочекувано излезе не е толку уверлива.
Разликата меѓу тогашниот скор на Зоран Заев, како единствен кандидат, и сегашниот на Ковачевски, како фаворит во трката со уште двајца кандидати, е околу 21,5 илјади гласови. Кога кон тоа ќе се додададат уште 6, 155, колку што вечера освоија заедно Деспотовски и Ременски, разликата во бројката на гласачи на СДСМ кои биле мотивирани да излезат на внатрепартиските избори се намалува на околу 15,4 илјади гласови во споредба со внатрепартиските избори во март, од кога порасан единствено бројката на неважечки ливчиња.
Ковачевски стана лидер на СДСМ со поддршка од 37 649 свои сопартијци, наспроти повеќе од десеткратно понискиот скор на второрангираниот кандидат – Деспотовски, кој освои 3 319 гласови, додека најслабо помина Ременски – со 2 836 гласа поддршка. Од Централната изборна комисија на СДСМ соопштија дека вчера вкупно 44 406 членови излегле на гласање, при што имало и 602 неважечки ливчиња.
Иако над 37 илјади гласа поддршка на партиски избори, навистина, се репрезентативна бројка, ако се прави споредба со претходните избори во СДСМ, се наметнува прашање зошто близу 16 илјади гласачи на СДСМ во март годинава излегоа на гласачките места, а вчера останаа дома, покрај уште речиси 20 илјади сдсмовски членови кои апстинирале и во двата изборни циклуси.
Според неофицијални информации на „360 степени“, на дел од неважечките ливчиња бил допишуван досегашниот партиски лидер Зоран Заев. Од тој аспект, се смета дека отпорот на дел од членството кон оставката на Заев е можеби една од причините поради значително помалиот одѕив на вторите наспроти првите директни внатрепартиски избори, што се одржаа пред само девет месеци, односно во март годинава.
Сепак, незадоволството на дел од членството поради оставката на Заев не се смета како единствена причина за апстиненцијата . Како аргумент во таа насока, соговорници од СДСМ посочуваат и на тоа дека партијата (или колаицијата на СДСМ) забележа пад во вкупниот број гласови и на неодамнешните локални избори, во споредба со ланските парламентарни избори, односно во период од околу 15 месеци.
Соговорниците од СДСМ велат дека зголемената апатија кај членството била забележан во централата на СДСМ на „Бихаќска“ уште пред изборите, односно во текот на електронската регистрација на членството за гласање. Веројатно поради тоа, од ЦИК на СДСМ вчера соопштија дека партиските членови кои до предвидениот рок не се регистрирале како гласачи тоа може да го направат во текот на денот на гласачите места. Односно дека право на глас имаат сите кои имаат електронска членска книшка на СДСМ.
Во почетокот на годинава, кога течеше процесот на ажурирање на членството во СДСМ и на издавање нови електронски членски книшки, од партијата соопштија дека имаат близу 80 илјади членови.
Новите членски книшки на СДСМ првпат беа искористени во втората половина на март годинава, на првите внатрепартиски избори, на кои, за разлика од вчера, се гласаше со „за“ и “против“, затоа што Заев беше единствен кандидат, кој тогаш бараше трет мандат на чело на партијата, но не од делегати на конгрес, туку од целото членство. Тогаш за него гласаа 59 240 негови сопартијци, против беа 865, а имаше 277 неважечки ливчиња. Според тоа, тогаш во гласачките кутии биле пуштени 60 382 ливчиња наспроти вчерашните 44 406.
Во СДСМ, според неофицијални најави, допрва ќе се анализираат причините за „апатичноста“ на дел од членството, кое во оваа 2021 година премиерно и дури двапати имаше можност лично да учествува во изборот на партиски лидер, наспроти претходната практика за избор на претседателот на конгрес, преку делегати од сите општински организации.
Новиот лидер Ковачевски, пак, освен што, веројатно, ќе треба да ја преземе одговорноста да ја предводи и Владата, во наредниот период ќе треба да работи и на кадровско доекипирање на партијата и на мобилизирање на членството, пред наредните избори, кои во редовен рок би се одржале кон средината на 2024 година (претседателски и парламентарни).
Тој вчера, откако беше избран за претседател, изјави дека негови три клучни принципи се враќање на единството во партијата, продолжување на социјалдемократските вредности и врз основа на нив градење на државните политики, како и давање фер шанса на сите кои поседуваат професионален капацитет.
Сепак, Ковачевски, според неговото синоќешно обраќање, не планира поголеми кадровски резови во СДСМ. Тој рече дека претстојниот партиски конгрес ќе биде отчетен (по локалните избори), а не изборен, иако ќе им се гласа доверба на партиските органи (н.з.) Посочи дека сегашните носители на функции во СДСМ беа избрани на конгресот што се одржа пред само седум месеци (во мај годинава), а дека тој ќе ја искористи статутарната можност да кооптира нови членови во Централниот одбор и потоа да се избере нов Извршен одбор.
Во таков случај, Ковачевски би можел да предложи и нови потпретседатели и секретари на партијата, додека заменик- претседателот се избира на конгрес. На таа функција во мај годинава беше избрана Сања Лукаревска, но по предлог на досегашниот лидер Заев.