Нов министер за финансии ќе биде актуелниот премиер Зоран Заев. Ова решение е најголемото изненадување во владината реконструкција што уште по првиот круг од претседателските избори ја најави токму претседателот на владата.
„Обврската за министер за финансии, покрај премиерската функција ќе ја вршам јас одреден период. Оваа одлука ја донесов заради тоа што оваа година ќе биде година за економијата. Тевдовски ќе работи околу мене, како советник. Следуваат храбри одлуки од кои бенефит ќе имаат сите граѓани“, изјави премиерот Зоран Заев.
Оваа информација премиерот ја соопшти од Валандово, на денешниот настан за отворање на втората фаза од системот за наводнување Јужна-вардарска долина. Освен заминувањето на Тевдовски, кој сега ќе биде негов советник, Заев ги откри и останатите промени во владата:
Садула Дураку заминува од министерството за животна средина и ќе биде на чело на новото министерство за политички систем и односи со заедниците. Ресорот екологија, сепак, останува кај ДУИ. Нов министер ќе биде Насер Нуредини.
Со министерството за земјоделство ќе раководи Трајан Димковски, кој беше шеф на кабинет на досегашниот министер Љупчо Николовски. За Николовски веќе се знаеше дека ја напушта позицијата за да стане нов генерален секретар на СДСМ.
Рокада има во министерството за локална самоуправа. Тоа место го добива ЛДП, а нов министер ќе биде лидерот на партијата Горан Милевски. Во овој момент ресорот го води Сухејл Фазлиу од НДП, партија која со реконструкцијата останува без министерско место.
Заев потврди и дека за нов министер за култура ќе биде предложен Хисни Исмаили од партијата Алтернатива. Тој доаѓа на местото на Асаф Адеми, кој си поднесе оставка уште во април поради здравствени причини.
„Метлата“, како што ја нарекуваше премиерот, ги зафаќа и досегашниот вицепремиер за спроведување на Рамковниот договор Хазби Лика и Зоран Шапуриќ- министерот без ресор задолжен за регулатива за подобрување на инвестициската клима за домашните претпријатија.
Очекувано е да има нови решенија и рокади и во пониските ешалони на власт, кај замениците министри и директорите на државни агенции и јавни претпријатија.
Премиерот Зоран Заев денеска и формално ќе го достави списокот на нови министри до Собранието. Предлогот би требало да биде разгледуван и усвоен во текот на претстојната работна недела.