Долгот кон ЕВН за неплатените сметки на одредени државни институции ќе биде намирен веднаш штом во Собранието ќе помине најавената пренамената на средствата од Буџетот, најави денеска вицепремиерот Битиќи
Државна компанија „Железници – транспорт“ напладне повторно доби струја, откако изутрината ЕВН поради долг за неплатени сметки ги исклучи од мрежата објектите на железничкото претпријатие кај депото во скопско Лисиче и во Велес.
Информацијата дека повторно има струја ја потврдија од „Железници – транспорт“, од каде што велат дека прекинот на напојувањето со струја не се одразил на одвивањето на железничкиот сообраќај, иако постоеше таква опасност со оглед дека струја им е потребна за пумпите за нафта.
Вицепремиерот за економски прашања Фатмир Битиќи, претходно во изјава за медиумите најави дека „Железници – транспорт“ ќе имаат струја и повтори дека долгот кон ЕВН за неплатените сметки на одредени државни институции ќе биде намирен веднаш штом во Собранието ќе помине најавената пренамената на средствата од Буџетот.
Според него, не треба никаква друга гаранција дека тоа ќе се исполни, бидејќи истото веќе го најавија и премиерот Димитар Ковачевски и други членови на Владата.
„Сметам дека веќе во овој момент во „Железници Транспорт“ има струја. Владата не е ниту договорна, ниту облигациска страна кон ЕВН и ако ЕВН не сфаќа дека Владата не е тука страна која дава гаранции, тогаш ЕВН има навистина проблем со толкување на нивното функционирање во нашата држава. Премиерот, вицепремиерот и министерот за финансии кажаа дека ќе се платат долгови кон ЕВН и тоа е сосема доволно за кој било економски оператор да сфати дека тоа е Влада и држава и оти не треба никакви други гаранции“,
рече Битиќи.
Исклучувањето на струјата денеска дојде откако ЕВН има даде рок до 15 овој месец на повеќе институции да го платат долгот за потрошена електрична енергија, меѓу кои се и Клиничкиот центар и „Железници – транспорт“ и други.