Против докторот во август беше отворена истрага за делото измама откако претходно ИРЛ го објави документарецот „Нечиста крв“ за лекувањето ковид-пациенти со методот хемофилтрација
Докторот Жан Митрев, сопственик на истоимената клиника, доставил гаранција од еден милион евра дека нема да избега во рамки на истрагата што се води против него за кривичното дело измама.
Гаранцијата, како што брифираат од Основното јавно обвинителство (ОЈО) Скопје, била доставена пред околу еден месец, откако претходно скопското обвинителство со отворање на истражната постапка бараше да му се одземе пасошот, што беше прифатено и од судот.
Истрагата беше отворена на 12 август, откако околу еден месец претходно траеше предистражната постапка која ОЈО Скопје ја започна по допрен глас по објавувањето на документарниот филм Истражувачката репортерска лабораторија (ИРЛ) за лекувањето ковид-пациенти со хемофилтрација во клиничката болница „Жан Митрев“.
Според досегашната динамика, таа би може да заврши за неколку месеци, по што ќе следува и одлука на Обвинителството дали ќе се покрене обвинение или не.
Кога беше отворена истрагата, од ОЈО Скопје соопштија дека докторот е осомничен за делото измама бидејќи во периодот од април 2020 до 2022 година со намера за болницата да прибави имотна корист, со лажно прикажување факти, ги довел во заблуда пациентите лекувани од ковид преку методот на хемофилтрација.
Митрев веќе беше да даде исказ, а од Клиниката тогаш рекоа дека остануваат отворено и целосно ќе соработуваат со институциите за кој било случај.
„Ние како Клиника досега, а и понатаму работиме целосно транспарентно и во интерес на пациентите. Овој однос не е само кон надлежните институции и тела во државата, туку е и кон нашите пациенти. Знаејќи ја вистината и водејќи се според високите стандарди на работа ќе помогнеме за откривање на фактичката состојба и ги ставаме на располагање сите наши материјални и човечки капацитети за да излезе вистината во јавноста“,
рекоа од клиниката „Жан Митрев“ кога беше отворена истрагата.
Документарецот на ИРЛ под наслов „Нечиста крв“ откри дека приватната болница која прими најмногу пациенти за време на ковид-19 пандемијата и во која лекувањето чинеше десетици илјади евра, го применувала методот хемофилтрација (филтрирање на крвта) кој, практично, бил клиничка студија. Наспроти домашното законодавство, клиничките студии не биле пријавени и одобрени од МАЛМЕД.
Во научните трудови објавени врз основа на клиничките студии во „Жан Митрев“ пишува и дека значителен дел од пациентите добиле интрахоспитални инфекции за време на лекувањето. Тоа го тврдат и дел од роднините на починати пациенти во болницата. Според Центарот за јавно здравје – Скопје, клиниката „Жан Митрев“ ниту еднаш не пријавила појава на интрахоспитални инфекции, иако по закон треба да го извести овој државен орган.