Пратеникот од Беса, Фадил Зендели, на Фејсбук напиша дека ќе поднесе оставка од пратеничката функција ако владејачката коалиција СДСМ-ДУИ, во контекст на уставните измени гласа за отстранување на условот 20 отсто и во Уставот се впише албанскиот јазик.
„Јас како пратеник поднесувам оставка од функцијата, доколку ДУИ и СДСМ гласаат за отстранување на 20% и албанскиот јазик е впишан во Уставот“
напиша Зендели.
Реакцијата на Зендели следува по условените оставки кои ги најавија министрите на ДУИ.
Во писмо до премиерот Ковачевски кое вчера го објави лидерот на ДУИ, Али Ахмети, се наведува дека земјава се наоѓа во критична фаза за нејзината европска иднина, па преземајќи ја одговорноста како политичка партија со оглед на условот од опозициската ВМРО-ДПМНЕ дека ќе поддржи уставни измени доколку има влада без ДУИ, тие се решиле на ваков чекор.
Од ВМРО-ДПМНЕ порачаа дека овa e првиот чекор. Очекуваат тие да бидат неотповикливи и да се одржат брзи избори бидејќи сѐ друго, според опозицијата, е одолговлекување.
Од владејачкиот СДСМ сметаат дека со условените оставки што ги поднесоа министрите на ДУИ, оваа партија покажала одговорност кон врвната стратешка цел – европската иднина на земјата и граѓаните.