Тој ги опиша нападите врз инфраструктурните објекти за електрична енергија како „друг вид руски терористички напади“
Украинскиот претседател Володимир Зеленски денеска информира дека 30 отсто од електраните во земјата се уништени во руските напади од 10 октомври наваму.
Според Зеленски, ова предизвикало масовни прекини на струја низ целата земја.
Тој ги опиша руските напади врз инфраструктурните објекти за електрична енергија како „друг вид руски терористички напади“.
„Друг вид руски терористички напади, чија цел е енергетската и критична инфраструктура на Украина. Од 10 октомври 30 отсто од електраните во Украина се уништени, предизвикувајќи масовни прекини на струја ширум земјата. Нема простор за преговори со режимот на Путин“,
напиша Зеленски на Твитер.
Another kind of Russian terrorist attacks: targeting ?? energy & critical infrastructure. Since Oct 10, 30% of Ukraine’s power stations have been destroyed, causing massive blackouts across the country. No space left for negotiations with Putin’s regime. @United24media pic.twitter.com/LN4A2GYgCK
— Володимир Зеленський (@ZelenskyyUa) October 18, 2022
Русија повторно негираше дека целта на нападите била цивилна инфраструктура, додека некои области на Киев и понатаму се без струја и вода.
На 10 октомври руската војска почна со жестоки ракетни напади на повеќе региони во Украина, меѓу кои и врз главниот град на земјата, Киев.
Во овие напади 19 луѓе беа убиени, а ранети 105 лица.
Нападите продолжија и во наредните денови. Вчера и денеска Киев и уште неколку други области беа цел на напади со дронови „камикаѕи“.
Градоначалникот на Киев, Виталиј Кличко, објави дека цел на денешниот напад била клучната инфраструктура во северниот дел на Киев. Украинските власти наведуваат дека имало три напади на електрична централа.