Предложените законски измени на опозициската ВМРО-ДПМНЕ и владејачкиот СДСМ следуваат по отворањето бугарските клубови „Ванчо Михајлов“ во Битола и „Цар Борис Трети“ во Охрид
Предлог измените и дополнувањата на Законот за здруженија и фондации, поднесен од ВМРО-ДПМНЕ, и на Законот за политичките партии, поднесен од СДСМ, денеска се на дневен ред на собраниската Комисија за политички систем и односи меѓу заедниците и Законодавно-правната комисија.
Пратениците пред две недели дадоа зелено светло Предлог-законот за изменување и дополнување на Законот за здруженија и фондации, поднесен од опозициската ВМРО-ДПМНЕ да се донесе по скратена постапка. Од присутните 84 пратеници, сите гласаа „за“.
Со законските измени кои ги предлага опозициската партија, би требало се ставило крај на, како што велат, отворање здруженија и фондации чии програми и цели се насочени кон уривање на уставниот поредок на земјава, кон поттикнување на воена агресија, како и кон разгорување национална, расна, верска омраза или друга нетрпеливост, нетолеранција, геноцид, екстерминација, поттикнување и одобрување фашизам, нацизам, национал-социјализам и третиот рајх, како и преземање активности поврзани со тероризам или активности спротивни на Уставот.
Измените на овој закон предвидуваат дека за употреба на име, презиме, прекар, псевдоним, кратенка или иницијали на историска личност, согласност дава министерот за правда, по претходно добиено позитивно мислење на Комисијата за употреба на имињата на историски личности.
Собранието, исто така, едногласно, со вкупно 76 гласа „за“, без ниту еден против или воздржан, даде поддршка по скратена постапка да се донесе и Предлог-законот за изменување и дополнување на Законот за политичките партии, поднесен пратеничката група на СДСМ. Целта на предлогот е да се зголеми транспарентноста и дистанцирање од фашизмот, нацизмот и национал-социјализмот.
Во образложението на Законот, објавен на веб страната на Собранието, стои дека со Предлог-законот се заштитуваат демократските вредности како и принципите на правната сигурност на граѓаните во едно демократско општество.
Предложените законски измени на двете партии следуваат по отворањето бугарските клубови „Ванчо Михајлов“ во Битола и „Цар Борис Трети“ во Охрид.
Владиното советодавно тело за употреба на имиња на историски личности, пак, вчера го оцени негативно барањето за регистрирање на клуб со името на Цар Фердинанд.
„Не само во историската наука туку и во колективната меморија на граѓаните, на населението, без разлика на етничката припадност, ликот на царот Фердинанд не се перципира позитивно со оглед дека како владетел со Бугарија на преминот од 19 во 20 век иницирал повеќе воени активности на територијата на Македонија. Независно кој го иницира ова здружение, неговото основање би предизвикало вознемиреност кај македонската јавност“,
изјави Бобан Петровски, претседавач на со Советодавното тело за употреба на имиња на историски личности при именувањето граѓански здруженија и фондации, универзитетскиот професор.