Фрустрацијата со ЕУ во регионот, како што се наведува во написот посветен на С Македонија, се надополнува со слабиот напредок на блокот во обезбедувањето вакцини на своите балкански соседи, што ги наведува да се обратат до Русија и Кина
Премиерот Зоран Заев во изјава за „Политико“ ја предупредува ЕУ дека нејзината репутација ќе биде на удар на Балканот и дека ќе изгуби простор пред ривалските сили ако наскоро не почне преговори за членство со Северна Македонија и Албанија.
„Политико“ потсетува дека членките на ЕУ се согласија пред повеќе од една година да почнат разговори со двете земји, но процесот е во мирување, главно зашто Бугарија го блокираше патот на Северна Македонија кон преговарачката маса. Владата во Софија инсистира на тоа дека билатералните спорови меѓу Бугарија и Северна Македонија околу јазикот и историјата мора да се решат пред да почнат разговорите.
Фрустрацијата со ЕУ во регионот, како што се наведува, се надополнува со слабиот напредок на блокот во обезбедувањето вакцини за коронавирус на своите балкански соседи, што ги наведува, наместо тоа, да се обратат до Русија и Кина.
„Многу прашања не беа како што очекуваа нашите граѓани и поради тоа се зголемува евроскептицизмот“,
вели Заев за „Политико“.
Тој оценува дека неуспехот да почнат преговорите ќе влијае не само на С Македонија и на Албанија, туку и на поширокиот регион на Западен Балкан, кој сега е опкружен со членки на ЕУ и беше сцена на серија војни во 90-тите години на минатиот век.
„Ако не се види дека ЕУ ги исполнува своите ветувања во регионот, тоа, исто така, ќе биде послаб стимул за Косово и за Србија да ги решат своите разлики во разговорите под покровителство на ЕУ и негативно ќе влијае на Босна и Херцеговина да ги реализира реформите за барањето за нејзино членство“,
вели Заев.
И ако патот на регионот кон ЕУ се забави, вели Заев, „има повеќе простор“ за другите сили, наведувајќи ги особено Русија и Кина.
Заев, исто така, ја отфрлил идејата што ја спомна еврокомесарот Вархеји за одвојување на С Македонија и Албанија. Во изјавата за „Политико“, македонскиот премиер посочува дека шефовите на европските институции, како и повеќе земји-членки на ЕУ, во последните денови јасно изјавија дека двете земји треба да одат заедно. Германија, Словачка и Грција, како што се посочува, се меѓу оние што јасно ставија до знаење дека не ги делат ставовите на унгарскиот еврокомесар за проширување.