Според опозицискиот лидер, премиерот ги урнал преговарачките позиции на земјава со Бугарија, така што тој, како што вели, повеќе е песимист отколку оптимист за добивање датум за првата меѓувладина конференција
Лидерот на ВМРО-ДПМНЕ Христијан Мицкоски изјави дека се сомнева дека земјава ќе добие датум за почеток на преговорите со Европската Унија за време на португалското претседателство, со оглед на, како што вели, пораките од дипломатите во Брисел дека нема позитивен одговор од сите земји членки.
„Од тоа што можам да го заклучам во овој момент, повеќе сум песимист отколку оптимиста дека сега, на крајот од јуни, со завршувањето на португалското претседателство, ние ќе го добиеме датумот за одржување на првата меѓувладина конференција, затоа што е јасна пораката од дипломатите во Брисел дека во овој момент нема позитивен одговор од сите земји членки на ЕУ, а таму одлуките се носат со консензус“,
изјави синоќа Мицкоски во гостување на „Рома њуз“, додека во тоа време премиерот Зоран Заев во Брисел ги повтори очекувањата дека ЕУ овој пат, како што рече, ќе го испорача ветеното.
Заев, на покана на потпретседателот на Европската комисија и висок претставник за безбедносна и надворешна политика на ЕУ Жозеп Борел, синоќа присуствуваше на заедничката работна вечера со лидерите на земјите од Западен Балкан. Од Брисел, Заев испрати порака дека земјава е подготвена и има добра волја за разговори со Бугарија за отворените билатерални прашања, без тоа да влијае кон пристапувањето кон ЕУ.
„Со лидерите на земјите од Западен Балкан имаме неподелен став дека ЕУ не може да смета дека е целосна без регионот и дека секое одлагање на процесот на вклучување на земјите од Западен Балкан ја доведува во прашање неколку пати повторуваната определба на ЕУ за проширување и кредибилитетот на Брисел меѓу нашите граѓани“,
изјави Заев.
Од друга страна, Мицкоски оценува дека Заев ги урнал преговарачките позиции на земјата и дека ја отворил Пандорината кутија.
„Првата работа е кога Зоран Заев ја отвори Пандорината кутија и кога одлучи, на сметка на националните интереси, државните интереси, да тргува, да се пазари со нашите соседи, мислејќи дека на тој начин ќе го одблокира евроинтегративниот пат. Тој не беше свесен дека на тој начин ги урива сите преговарачки позиции што се создавани со години и дека кога еднаш ќе ја отворите Пандорината кутија многу тешко ќе ја затворите и дека на барањата на соговорникот ќе им нема крај, затоа што вие сакате да бидете каде што е вашиот соговорник“,
заклучи Мицкоски.