Интензивниот ангажман на вклучените страни создава можности за остварување на заедничката цел, а тоа е одржување на меѓувладината конференција за почеток на преговорите на С Македонија со ЕУ.
Ова е дел од разговорот меѓу премиерот Зоран Заев и германската канцеларка Ангела Меркел. Заев и Меркел попладнево телефонски разговарале и двајцата го истакнале интересот дека за време на германското претседателство со ЕУ, треба да се одржи првата меѓувладина конференција во декември како почеток на преговорите на Северна Македонија за членство во ЕУ.
„Премиерот Заев истакна дека тоа е шанса која не треба да биде пропуштена и дека интензивниот ангажман на вклучените страни создава можности за остварување на заедничката цел – одржување на меѓувладината конференција за почеток на преговорите“,
информираат од влаидната прес-служба.
Германија направи многу за европската иднина на Западен Балкан, потенцирал Заев, додавајќи дека и Берлинскиот процес, со којшто годинава претседаваат заедно Бугарија и С Македонија, е од големо значење.
„Заев изрази благодарност за зголемениот ангажман на германското претседателство со ЕУ, за личното вклучување на министерот за надворешни работи Хајко Маас, на државниот министер за ЕУ Михаил Рот, како и за личниот ангажман на канцеларката Меркел“,
информираат од Владата.
На интересот за ситуацијата со ковид-19 во нашата земја, Заев ја информирал Меркел дека сите капацитети на државата се ангажирани во справувањето со пандемијата, а се залагодарил на помошта со медицинската опрема од Германија, како и за финансиската поддршка која ја покажува солидарноста на ЕУ со земјите од регионот и со Западен Балкан во целина.