Премиерот ги презентираше стратегиските приоритети во новиот мандат на неговата Влада, со посебен осврт на евроатлантските интеграции на земјата
Премиерот Зоран Заев, придружуван од вицепремиерот за борба против корупција Љупчо Николовски, шефот на дипломатијата Бујар Османи, министерот за правда Бојан Маричиќ и државните секретари Калина Габер од Секретаријатот за европски прашања и Зоран Попов од Министерството за надворешни работи, денеска одржаа утринска брифинг средба со амбасадорите на земјите членки на Европската Унија во нашата држава, соопшти владината прес-служба.
На брифингот премиерот Заев ги презентираше стратегиските приоритети во следниот четиригодишен мандат, со посебен осврт на евроатлантските интеграции на земјата.
Заев рече дека изминатиот мандат на Владата направи комплетен пресврт во надворешната политика на земјата, отворање и решавање на децениските спорови со соседите, членство во НАТО и го почна трансформацискиот процес за приклучување кон ЕУ.
„Овој мандат ќе биде посветен кон темелни реформи на целото општество. Свесни сме за предизвиците што ги носи корона- кризата, но, сепак, ќе останеме целосно фокусирани на реформите во правосудството, градење на нова трансформирана економија, заштита на животната средина и подобрување на животниот стандард на сите категории на граѓани во нашата земја. Имаме план за отворање на 80% поглавја до 2024, да доизградиме силна преговарачка структура со учество на сите чинители, креирање на буџетски програми за преговори со ЕУ. Ја зајакнуваме кадровска екипираност и ќе продолжиме да обезбедуваме поддршка за капацитети за имплементација на ИПА 3“,
изјави Заев.
Вицепремиерот Николовски пред амбасадорите ги презентираше приоритетите на неговиот кабинет.
„Во овој мандат, ја воспоставивме оваа позиција затоа што сметавме дека е потребно да имаме директен линк помеѓу Комисијата за спречување на корупција со извршната власт според препораките на ГРЕКО од март 2019 година. Дополнително приоритет на мојот кабинет ќе биде одржлив развој и човечките ресурси. Мора да направиме чекор напред кон подобрување на образованието, животната средина, здравството но и бизнис климата за сите граѓани на нашата држава“,
рече Николовски.
Новиот министер за надворешни работи ги претстави трите клучни приоритети на надворешната политика на земјата кои соодветствуваат со стратегиските амбиции за засилена европска и евроатлантска интеграција.
„Првиот фокус ни е секако почетокот на преговорите со ЕУ, како клучен чекор во остварувањето на нашата стратешка амбиција, полноправно членство во Унијата. Во овој дел секако очекуваме континуитет на поддршката и од нашиот стратешки партнер, САД и на другите НАТО сојузници, кои се и наши долгогодишни поддржувачи од секој аспект. Секако, во сличен контекст очекувам да оствариме не само континуитет, туку и засилена активност во продлабочување и унапредување на добрососедските односи, засилување на мултилатерализмот и придонес во имплементацијата на сите регионални иницијативи“,
посочи Османи.
Министерот за правда истакна дека одлуката за почеток на преговорите најмногу говори за нашата посветеност за правда и европеизација.
„Заедно со нашите партнери ќе утврдиме модел кој ќе обезбеди ефикасно и објективно прочистување на судството. Потребен е ефикасен правосуден систем кој ќе обезбеди брза борба против корупцијата со целосно почитување на човековите права. Со поддршка на нашите европски партнери ќе обезбедиме и мониторинг на судските процеси“,
рече Маричиќ.
Евроамбасадорот Самуел Жбогар ги пренесе очекувањата за брзи и квалитетни реформи, но и посочи дека европските партнери на Северна Македонија остануваат доследно посветени на помош за земјата во пребродување на последиците кои настанаа од корона – кризата и реформските зафати на новата Влада.