Од СДСМ, пак, денеска рекоа дека не очекуваат блокади и најавија дека ќе ги искористат сите деловнички можности за ребалансот да биде донесен
Ребалансот на Буџетот само ги покажува безидејните политики на власта на СДСМ и ДУИ кои носат економска катастрофа, реагираат од опозициската ВМРО-ДПМНЕ откако вчера Владата го усвои, а денеска министерот за финансии Фатмир Бесими на прес-конференција го презентираше ребалансот.
Според ВМРО-ДПМНЕ, ребалансот ќе значи продолжување на економскиот хаос и пропаѓањето.
„Кратењето на капиталните инвестиции докажува дека оваа власт нема ниту план ниту визија како Македонија да излезе од економската криза, за која самата е одговорна. Ако на ова се надоврзе лошата реализација, тогаш доаѓаме до заклучок дека нема да има речиси никаква активност на Владата на овој план, што е клучен за економијата“,
велат од опозициската партија.
Според нив, и со ребалансот има стотици милиони евра непродуктивни трошоци од кои се скратени само дел.
„Тие стотици милиони евра требаше да бидат искористени од самиот почеток на годината за заштита на стандардот на граѓаните и поддршка на економијата. Со тоа ќе се спречеа последиците на кризата, за која и самите говореа дека занеле дека ќе дојде уште од минатата есен. Сега наместо да се превенира, ќе се потрошат двојно повеќе средства за да делумно се санираат негативните ефекти“,
велат од ВМРО-ДПМНЕ.
Откако вчера ребалансот помина на владина седница веднаш бил потпишан од премиерот Димитар Ковачевски и веќе е испратен во Собранието. Од СДСМ денеска рекоа дека не очекуваат блокади и најавија дека ќе ги искористат сите деловнички можности за ребалансот да биде донесен.
„Како што и сами напоменавте ребалансот ќе се најде за многу скоро пред пратениците, јас не очекувам дека ќе биде блокиран напротив ние како владејачко мнозинство сме подготвени да ги искористиме сите алатки и сите можности којшто ги дава и деловникот се со цел да го донесеме и ребалансот и останатите закони затоа што е важно во вакви услови кога се соочуваме со енергетска и економска криза, важно е да се носат суштински реформски закони, да се донесе и ребалансот и сето она што е во насока да го подобри стандардот на граѓаните и секако да помогне полесно да се справат граѓаните со последиците од овие кризи“,
вели пратеникот и портпарол на СДСМ, Дарко Каевски.