ВМРО-ДПМНЕ во моментов на кризата со ковид-19 не сака да лицитира со можен датум за парламентарни избори, кои првично требаше да се одржат на 12 април, но се одложија поради епидемијата.
„Мислам дека е дегутантно, нечовечки во услови кога секој ден имаме нови болни од корона, во услови кога секој ден илјадници луѓе губат работни места и во услови кога за жал и семејства губат свои најблиски како последица на корона, било кој да зборува за датум за избори. Срамота е, дегутантно е, да ви кажам искрено, смачено ни е од ова однесување на СДСМ. Ова е нечовечко однесување на СДСМ во ваква криза да се наметнува тема за датум за избори мислам дека е нечовечки. Ние сме спремни како политика партија и ќе го победиме СДСМ кога сакаат и кај сакаат“,
рече потпретседателот на партијата, Александар Николоски.
Во однос на кандидатските листи со кои ќе се настапи на изборите, рече тој, тие веќе се потврдени од Државната изборна комисија и тоа е завршена работа.
Одговарајќи токму на прашање за изборите, тој ја обвини власта дека ги крие реалните бројки на заразени тврдејќи дека вистинските се далеку поголеми, а надлежните за да сокријат не тестираат доволно, ниту ја информираат јавноста доволно.