„Мојот став е ист како и од институциите – дека се работи за регуларна проверка во којашто било идентификувано лице коешто пренесувало пиротехнички средства и целиот случај потоа е предаден во Обвинителство, како и за секој друг граѓанин“, вели премиерот
За случајот со Дрин Ахмети, внукот на лидерот на ДУИ, Али Ахмети, кој на 30 декември беше фатен со полн багаж пиротехника, премиерот Димитар Ковачевски вели дека се поставува како и за секој друг граѓанин во државата.
„Мојот став е таков каков што е и од институциите – дека се работи за регуларна проверка во којашто било идентификувано лице коешто пренесувало пиротехнички средства и целиот случај потоа е предаден на Обвинителство како и за секој друг граѓанин“,
рече Ковачевски на новинарско прашање во однос на наводни шпекулации дека политиката замешала прсти во случајот со Дрин Ахмети.
Дрин Ахмети беше приведен откако беше фатен со над 700 парчиња пиротехника на претпоследниот ден од 2023 година. Тој ја пренесувал пиротехниката во багажникот на својот „рејнџ ровер“ со албански регистарски таблички кога бил фатен од полицијата на улица „Самуилова“ во Скопје, нешто пред 20 часот вечерта на 30 декември.
Подоцна беше соопштено дека 25-годишниот Ахмети пренесувал 749 парчиња пиротехника, како и дека е одведен во полициска станица, а дека по документирање на случајот против него ќе биде поднесена соодветна пријава.
Во врска со случајот сега треба да се произнесе Основното јавно обвинителство кое треба да го одреди натамошниот тек на постапката согласно вештачењата на пронајдената пиротехника.