Тој извештај, вели Мицкоски, е добра основа за да почне да се подобрува позицијата на земјата
Премиерот Христијан Мицкоски смета дека е логичен извештајот на „Транспаренси интернешнл“ за Индексот на перцепција на корупцијата во кој се наведува дека земјава во 2024 година бележи пад од два индексни поена во однос на претходната година.
Според Мицкоски, падот од два поена е резултат на „сите оние злоупотреби на европско знаме, коруптивни скандали што беа во периодот на минатата влада“.
Тој извештај, вели Мицкоски, е добра основа за да почне да се подобрува позицијата на земјата.
„Логичен е тој извештај и добро е што е само два поена, мислев дека ќе биде и повеќе. Ако ги забележите сите седум критериуми, ќе видите дека сите се однесуваат во периодот кога е претходната влада, детално го изанализирав. Тоа е добра основа да почнеме да ја подобруваме нашата позиција. Апсолутно ќе го задолжам и денеска на владина седница соодветниот министер да ги детектира слабостите што таму прилично јасно се детектирани и тоа веќе да не ни се повторува“,
рече Мицкоски одговарајќи на новинарски прашања на денешната прес-конференција.
Мицкоски, навраќајќи се на информации што беа објавувани од неговата партија додека беа во опозиција, денеска рече дека сето тоа повеќе нема да се повтори.
„Повеќе нема да се повтори ’Соравија’ во центарот на Скопје, нема да ни се повтори измени на кривичен законик со злоупотреба на европско знаме, нема да ни се повторат ’бентли’, ’астон мартин’, ’ролс ројс’ автомобили на блиски роднини на нашите семејства. Нема да ни се повторат наместени тендери за фотонапонски централи на високи владини функционери. Сето тоа е нотирано тука и ни е добра основа за понатаму да следиме дали ќе напредуваме, ќе бидеме подобри или ќе бидеме полоши“,
додаде Мицкоски.
На рангирањето за Индексот на перцепција на корупцијата за 2024 година на „Транспаренси интернешнл“, С Македонија го дели 88. место заедно со Казахстан, Суринам и Виетнам.
Земјава е рангирана со 40 индексни поени, што е за три под просекот (43 од можни 100). Во однос на 2023 година бележи пад од два индексни поени кога била рангирана на 76 позиција.
Според Благоја Пандовски, претседател на „Транспаренси интернешнл-Македонија“, и оваа година Индексот на перцепција на корупцијата покажува дека Македонија е далеку под минимумот од 50 поени кои се долната граница под која не може да се каже дека една земја има задоволителни активности насочени кон сузбивање на корупцијата. Во 2024 година се бележи пад од дури 12 позиции на табелата во однос на претходната година.
Според Пандовски, овие негативни резултати се последица на големиот број на скандали кои се случија минатата година, а особено во областа на судството, Судскиот совет и Академијата за судии и јавни обвинители.