За два дена, од 6 до 8 април, затворени се четири угостителски објекти во Битола, Гостивар и Тетово кои не ја почитувале забраната за работа, а надвор од употреба се ставени 40 кафемати во Скопје, Охрид и во Гостивар.
Како што соопшти претседателката на Инспекцискиот совет Магдалена Филиповска-Грашкоска, во овие два дена шесте инспекциски служби спровеле вкупно 1 346 надзори за тоа како се почитуваат мерките за заштита од ширење на коронавирусот, од кои 547 од Државниот пазарен инспекторат.
Пазарните инспектори извршиле и визуелни контроли на угостителските објекти низ државата, при што е констатирано дека генерално се почитува забраната за работа, а кај мал дел од трговците се констатирани зголемени цени на производи и по надзорите тие се вратени на износот од 11 март.
При извршени 164 надзори од инспекторите на Агенцијата за храна и ветеринарство, изречени се шест мерки и едукации поради неспроведени обуки за основни знаења за безбедност на храна и се изречени седум решенија за констатирана лоша општа хигиенска состојба.
Агенцијата за лекови спровела 43 контроли, при што е констатирано дека нема специфични отстапувања и дека секторот ги почитува препораките, односно се одржува ред во аптеките, а цените се во согласност со одлуките на Владата.
Трудовиот инспекторат, пак, извршил 422 надзори и изрекол едно решение и 11 укажувања во однос на почитување на препораката за ослободување од работа на лица со деца до 10 години.
Транспортниот инспекторат, пак, извршил 114 надзори и повторно е констатирано дека меѓуопштинскиот превоз е редуциран за 90 проценти, а автобуските станици ги почитуваат владините препораки.