„Не можам да му се јавам (на рускиот претседател н.з.) додека не знам што ќе кажат Американците. Не би сакал да ги расипуваме добрите односи со Русите, а сакам да имаме добри односи и со Американците“, изјави претседателот на Србија
Српскиот претседател Александар Вучиќ најави дека наскоро ќе разговара со својот руски колега Владимир Путин во врска со американските санкции врз Нафтената индустрија на Србија (НИС), поради руска сопственост.
„Не можам да му се јавам додека не знам што ќе кажат Американците. Не би сакал да ги расипуваме добрите односи со Русите, а сакам да имаме добри односи и со Американците. Мораме да ја зачуваме нашата земја. Ќе најдеме решение. Ќе дадам сè од себе“,
рече Вучиќ.
Српскиот претседател соопшти дека барањето на Нафтената индустрија на Србија до САД за одложување на санкциите за најмалку 90 дена, додека не се најде решение за сопственичката структура и управувањето на компанијата, е добиен одговор само од Амбасадата на САД во Србија, но оти се чека одговор од Канцеларијата за контрола на странски средства на Министерството за финансии на САД.
Вучиќ додаде дека една од причините за жестоките напади врз земјата е тоа што Србија е единствената земја во Европа која не вовела санкции против Русија.
„Да ги воведевме, ќе бевме најлошите предавници на светот, а сега велат дека сме ‘најголемите будали’ во светот, но мислам дека ова е единствената добра политика“,
рече српскиот претседател.
Во јануари САД на својот список на санкции ја ставија Нафтената индустрија на Србија (НИС), која е во мнозинска сопственост на Русија, во обид да ја спречат Москва да ги користи приходите од енергијата за војната во Украина.