Вучиќ истакнал дека Србија работи одговорно и пристапува кон разговорите со цел да се постигнат компромисни и одржливи решенија неопходни за нормален живот и подобра иднина за сите граѓани, со јасно наведени ограничувања. Разговорот со Лајчак, како што соопшти Вучиќ во објава на Инстаграм, ќе продолжи вечерва и утре
Формирањето на Заедницата на српски општини е предуслов за нормализирање на односите, како и за безбедноста и заштитата на правата на српскиот народ на Косово, истакнал српскиот претседател Александар Вучиќ на денешната средба со специјалниот претставник на Европската Унија (ЕУ) за дијалогот меѓу Белград и Приштина, Мирослав Лајчак, пренесува РТС.
Вучиќ и Лајчак, кој е во дводнвена посета на Белград, имаа состанок денеска попладне, на кој, како што соопштија од канцеларијата за соработка со медиумите на српскиот претседател, разговарале за европскиот предлог, за формирањето на Заедницата на српски општини и за другите неопходни чекори во насока на нормализирање на односите меѓу Србија и Косово.
Вучиќ истакнал дека Србија работи одговорно и пристапува кон разговорите со цел да се постигнат компромисни и одржливи решенија неопходни за нормален живот и подобра иднина за сите граѓани, со јасно наведени ограничувања.
Српскиот претседател, во објава на Инстаграм, го оцени состанокот со специјалниот претставник на ЕУ како „тежок и содржаен“ и најави дека ќе продолжи вечерва и утре.
„Разговорот за Косово и Метохија ќе го продолжиме вечерва и утре“,
напиша Вучиќ.
Како што беше и најавено, Лајчак е во дводневна посета на Белград откако минатата недела престојуваше во Приштина, каде што разговараше со премиерот на Косово, Албин Курти, како дел од подготовките за средбата меѓу двајцата лидери што треба да се одржи во Охрид на 18 март.
Специјалниот претставник на ЕУ на 9 март во Приштина рече дека имал конструктивен и многу важен разговор со Курти за спроведувањето на планот за нормализација на односите и додаде дека средбата ги исполнила неговите очекувања и дека „добро разбира“ кои се очекувањата на Косово.
Словачкиот дипломат по средбата со Курти рече и дека двете страни мора да се договорат за анексот за имплементација бидејќи доколку предлогот за нормализирање на односите меѓу Косово и Србија биде прифатен од двете страни, нема да биде правно обврзувачки без него.
Инаку, како што пишува порталот „Нова“, Лајчак ќе разговара и со претставници на опозицијата во Белград, како што беше случај и во Приштина, за да го слушне нивниот став за предлогот за нормализација на односите меѓу Косово и Србија.
На средбата со Лајчак, според „Нова“, биле поканети лидерите на Партијата за слобода и правда, Демократската партија, Движењето на слободни граѓани, Народната партија, движењето „Да не го давиме Белград“ (Не давимо Београд) и партијата Заедно.
На 18 март, односно в сабота, Вучиќ и Курти треба да се сретнат во Охрид во рамките на дијалогот со посредство на ЕУ, а фокусот на средбата, чиј домаќин е Борел, ќе биде финализирањето на анексот за имплементација на предлогот за нормализација на односите меѓу Косово и Србија.
Европската служба за надворешни работи (ЕЕАС) соопшти дека Борел и Лајчак прво во Охрид ќе имаат одвоени средби со Вучиќ и Курти, а потоа ќе следува заедничка трилатерална средба.
По средбата на Вучиќ, Курти, Борел и Лајчак во Брисел на 27 февруари, шефот на европската дипломатија изјави дека лидерите на двете страни постигнале согласност за патот кон нормализирање на односите меѓу Косово и Србија, но дека се потребни дополнителни преговори за анексот за имплементација, кој е составен дел на европскиот предлог.
Европскиот предлог, кој исто така е познат и како француско-германски план и ја има поддршката од западните земји, се состои од единаесет точки и има цел да ги реши разликите меѓу двете страни.
Во него експлицитно не се споменува меѓусебно признавање, но во членот 2 се вели дека страните мора да ги почитуваат независноста, автономијата и територијалниот интегритет, правото на самоопределување, заштитата на човековите права и недискриминацијата.
Се предвидува посебен аранжман за српската заедница во Косово, гаранции за Српската православна црква и признавање на државните симболи, царинските печати, регистарските таблички и дипломите.
Извештајот од преговорите меѓу Вучиќ и Курти ќе биде разгледан на состанокот на Европскиот совет на 23 и 24 март.