Советот испрати вакво барање до Врховниот суд, како институција која обезбедува единство во примената на законите, а допис со слична содржина е испратен и до апелациските судови во Скопје, Битола, Штип и во Гостивар
Судскиот совет ќе проверува неколку предмети од областа на сообраќајот за кои во последно време има реакции во јавноста
Судскиот совет бара од Врховен и од апелациските судови да ја изедначат казнената политика за кривични дела од областа на сообраќајот, по, како што се наведува, зачестените реакции во врска со актуелни предмети по однос на изречени санкции од областа на сообраќајот, особено за кривичното дело „тешки дела против безбедноста на луѓето и имотот во сообраќајот.“
Судскиот совет, како што информираат оттаму, испрати барање до Врховниот суд, како највисок суд, кој според Уставот обезбедува единство во примената на законите и воедначување на судската практика, со кое укажува дека е неопходно да се преиспита казнената политика за кривични дела од областа на сообраќајот.
Во дописот до Врховен суд, Судскиот совет наведува дека согласно член 101 од Уставот, Врховен суд обезбедува единство во примената на законите од страна на судовите. Врховниот суд, преку обезбедување единство во примената на законите ја воедначува судската практика. Затоа е формирано одделение за воедначување на судската практика во рамките на Врховниот суд.
„Заради постигнување на оваа цел, согласно член 37 од Законот за судовите се предвидени начелни ставови и начелни правни мислења за обезбедување единство во примена на законите. Тргнувајќи од стратешката цел на Судскиот совет за враќање на довербата на граѓаните во судовите и зачестените реакции во врска со актуелни предмети по однос на изречени санкции од областа на сообраќајот, особено за кривичното дело ’тешки дела против безбедноста на луѓето и имотот во сообраќајот’, Судскиот совет укажува на невоедначена судска практика по однос на казнената политика. Оттаму и потребата да се преиспита казнената политика, односно да се обезбеди единство во примената на законите“,
се нагласува во дописот.
Судскиот совет напоменува дека вакво барање до Врховен суд е испратено и во септември 2020 година, поттикнато од невоедначената судска практика и од поднесените голем број претставки од граѓани, во врска со изречени санкции за кривични дела од областа на сообраќајот.
Барање со слична содржина Судски совет испратил и до апелациските судови во Скопје, Битола, Штип и во Гостивар, со цел и тие да се вклучат во процесот на воедначување на казнената политика во врска со кривините дела од областа на сообраќајот. Во дописот до апелациските судови се наведува:
„Имајќи предвид дека апелациските судови, најчесто два пати во годината, расправаат за правни прашања за кои не е усогласена судската практика, Судскиот совет дава целосна поддршка судовите да продолжат со ваквата практика, особено што во изминатиот период на различни апелациски подрачја се зачестени појавите на невоедначена судска практика за кривични дела од областа на сообраќајот . Дополнително, членови на Судски совет, во својство на координатори на судови, ќе направат увид во неколку предмети од областа на сообраќајот кои се водат во некои од судовите, а за кои во последно време има реакции во јавноста“.
ПОВРЗАНИ ВЕСТИ:
Кривичен изрече затворска казна од 7,5 години за сообраќајката во која загина Јелена Филиповиќ
Апелацискиот суд ја удвои казната за возачот кој ја прегази Верица Белчовска