Казната затвор во траење од 15 месеци, што ја изрече Основниот суд во Струмица, сега е зголемена на 30 месеци
Апелацискиот суд во Штип ја зголемил од 15 на 30 месеци казната затвор за И.Ч. (18) од Струмица поради прегазувањето на Верица Белчовска (20) од беровско Русиново.
Во јули годинава Основниот суд во Струмица изрече пресуда од 15 месеци затвор за сообраќајната несреќа која се случи на 7 април годинава на булеварот „Ленинова“ во Струмица, кога момчето кое возело „нисан“ удрило во Верица, која преминувала на пешачки премин. Возачот избегал од местото на несреќата, а подоцна истиот ден, самиот се пријавил во полициска станица.
Пресудата на Апелацискиот суд во Штип ја соопшти адвокатката на семејството Белчовски преку писмена изјава за медиумите.
По загинувањето на Верица, семејството ги донираше нејзините органи, кои спасија три животи.