Главни теми при нејзината посета се очекува да бидат европската перспектива на регионот и процесот на пристапување кон ЕУ
Од 30 септември до 2 октомври, претседателката на Европската комисија (ЕК), Урсула фон дер Лајен ќе посети четири земји од Западен Балкан, како Албанија, Косово, Црна Гора и Северна Македонија.
Како што изјави портпаролката на ЕК, Аријана Подеста, Србија и Босна и Херцеговина не се вклучени во програмата, поради престојните избори во овие две земји.
Турнејата на Фон дер Лајен почнува на 30 септември. Главни теми при нејзината посета на Албанија, Косово, Црна Гора и Северна Македонија се очекува да бидат европската перспектива на регионот и процесот на пристапување кон ЕУ.
Претседателката на ЕК традиционално врши годишни посети на Западен Балкан. За време на нејзините претходни турнеи регионот се третираше како единствен пакет во кој беа вклучени и Србија и Босна и Херцеговина.
На пример, минатата година таа ги посети Албанија, Црна Гора, Босна и Херцеговина, Србија, Косово и Северна Македонија.
За Србија е предвидено одржување на предвремени парламентарни избори на 25 октомври. Одлуката за распуштање на парламентот и распишување на изборите е потпишана од српскиот претседател Александар Вучиќ на 9 септември.
Се појавија медиумски шпекулации дека Фон дер Лајен би можела да ја изостави Србија од балканската турнеја поради политичките и социјалните тензии во земјата. Дополнителни реакции од ЕУ предизвика и погребот на Ратко Младиќ, поранешниот командант на Војската на босанските Срби, кој беше осуден на доживотен затвор за геноцид и воени злосторства. Дел од членовите на Европскиот парламент ја повикаа претседателката на Европската комисија да не ја посетува Србија.
Во Босна и Херцеговина, општите избори ќе се одржат на 4 октомври, кога гласачите че избираат членови на тричленото Претседателство, пратеници во државниот парламент, како и претставници на законодавните тела на Федерацијата Босна и Херцеговина и на Република Српска.
Посетата на Фон дер Лајен во земјава, пред неколку дена ја најави евроамбасадорот Михалис Рокас, изразувајќи надеж дека тоа ќе даде дополнителен поттик за европската интеграција, но и одлучувачки чекор кон почнување на пристапните преговори на земјата со Европската Унија.
„Се надевам дека набргу ќе имаме регионална посета од страна на претседателката на Европската комисија, Урсула фон дер Лајен. Таа треба да се реализира за две до три недели, така што се надевам дека нејзината посета ќе биде уште еден одлучувачки чекор кон почнување на пристапните чекори со Европската Унија“,
рече Рокас.