Седум години и шест месеци затвор изрече денеска Основниот кривичен суд во Скопје за возачот на автомобилот од сообраќајката во која загина 17-годишната Јелена Филиповиќ од Куманово.
Изрекувањето на пресудата следува откако обвинетото момче на претходното рочиште ја призна вината.
„На 19.11.2021 година беше закажано рочиште по предметот за Јелена Филиповиќ на кое беше јавно објавена пресудата со која судот обвинетиот го огласи за виновен и му определи казна ефективен затвор во траење од 7 години и 6 месеци. Воедно судот му изрече и забрана за управување со моторно возило во траење од 5 години. По предлог на јавниот обвинител, судот донесе решение за замена на мерката куќен притвор со затворски притвор“,
информираше Коалицијата „Сите за правично судење“.
Сообраќајката во која загина Јелена се случи минатата година, ноќта кога се прославуваше Стара нова година. Со автомобилот се возеле обвинетиот возач, Јелена и уште едно девојче, кои се враќал кон Куманово, кога излетале од патот во близина на Миладиновци.