Целта на акцијата е да се подобрат водоснабдувањето и притисокот во Општина Ѓорче Петров и Карпош, како и да се поправат значителни загуби на вода кои постојат во овие делови од градот
ЈП „Водовод и канализација“-Скопје објави дека на 21 декември ќе започне санација и децениски задоцнета модернизација на главниот градски водовод.
Зафатот е планиран во раните утрински часови, а проценките се дека нема да трае повеќе од 15 часа.
Целта на акцијата е да се подобрат водоснабдувањето и притисокот во Општина Ѓорче Петров и Карпош, како и да се поправат значителни загуби на вода кои постојат во овие делови од градот.
„Главната цел на оперативниот план е да се подобрат водоснабдувањето и притисокот во Општина Ѓорче Петров и Карпош, преку репарација на шест критични сегменти на водоводната мрежа каде што се забележани огромни загуби на вода. Акцијата е неопходна за да се спречат проблеми како што се тие во Тетово, Битола, Штип и Неготино, каде што граѓаните немаат вода поради несанирани дефекти“,
информираат од претпријатието.
Од „Водовод и канализација“ соопштија дека ќе бидат преземени следните мерки:
- Замена на нефункционален затворач Ф400 мм на кружен тек во Ѓорче Петров.
- Репарација на затворач Ф600 мм на мостот „Обединети нации“, кој е во процес на протекување.
- Заптивање на затворач Ф700 мм на булевар „Партизански Одреди“, кој исто така протекува, како и замена на затворач Ф150 кој се наоѓа во истата шахта.
- Санација на затворач Ф700 мм и Ф500 мм на ул. „Никола Парапунов“.
- Замена на четири воздушни вентили.
Во текот на операцијата сите екипи на секторите ЕОК, Механизација и Водовод ќе бидат присутни на локациите на зафатите. Се очекува целата санација да биде завршена за помалку од 15 часа, при што најголем дел од времето ќе се одвои за процесот на празнење и полнење на магистралниот водовод.
„Апелираме до сите јавни чинители да внимаваат при изнесувањето информации и да не предизвикуваат страв и паника кај граѓаните за неколкучасовното немање вода. Овој сериозен зафат се презема за да се превенираат состојби како што се тие во Тетово, Битола, Штип и Неготино, каде со денови и недели немаше вода поради несанирани дефекти“,
велат од Водовод.
Деновиве најавениот прекин на вода во голем број скопски општини ја зголеми побарувачката за вода низ маркетите, а најмногу се празнат рафтовите каде што стојат тубите со пет литри.