Засега нема информации дали и колку лица од Министерството за внатрешни работи ќе бидат во изолација откако министерот Оливер Спасовски доцна синоќа објави дека има позитивен резултат на тестот за ковид-19. Ниту некој претставник на СДСМ засега има решение за самоизолација, со оглед дека еден ден претходно на „Бихаќска“ беше собрано партиското раководство за дигиталниот конгрес.
„Во тек е епидемиолошка анкета за контактите што министерот Спасовски ги имал деновиве. По ова ќе се знае точно кој ќе добие решение за самоизолација. Напоменуваме дека сите негови контакти биле со почитување безбедно растојание и носење маска. Во однос на прашањето за контакти во Владата, потсетуваме дека седниците се одржуваат преку видеоконференциска врска“,
велат од МВР.
Од СДСМ нагласуваат дека за време на партискиот конгрес ги почитувале сите мерки, но ако здравствените власти одлучат некој да оди во изолација, дополнително ќе ја информираат јавноста.
„Сите активности во седиштето на партијата, секој ден, се одржуваат согласно мерките за заштита од коронавирусот. Впрочем, затоа и одржавме дигитален конгрес. Тој се одржа во голема просторија со помалку од 30% исполнетост на просторот. Целосно се почитуваше задолжителното носење маска од сите присутни, освен за време на обраќањата, кои беа на драстично поголема дистанца од предвидената, имаше постојана дезинфекција и достапни средства, сите присутни беа на соодветна и доволна физичка дистанца, со постојано проветрување на просторот и постојана дезинфекција на микрофоните, говорницата и другите површни во салата. Дополнително, пред влезот во салата на сите им беше измерена температура, согласно протоколите“,
велат од СДСМ и додаваат дека тоа може да се забележи и на сите фотографии од настанот, како од партиското седиште така и од салите во општинските организации каде беа сместени делегатите.
Епидемиолошките анкети, велат од партијата, е задача на здравствените установи и тие согласно наодите и резултатите ќе постапат.
„Доколку здравствените, стручни институции утврдат дека некој претставник на СДСМ треба да биде во изолација, јавноста ќе биде информирана за тоа“,
велат социјалдемократите.
Премиерот Заев, пак, во изјава за ТВ21 денеска посочи дека, иако немал контакти со Спасовски надвор од здравствените протоколи, сепак, ќе направи тест.
При објавата дека е позитивен на ковид-19, Спасовски рече дека строго ги почитувал мерките, но добил позитивен резултат. Клиничката слика, како што информираше, му е добра и има благи симптоми.