Откако премиерот уште еднаш повтори дека ќе нема вонредни парламентарни избори заедно со локалните, од опозициската партија му возвратија дека тој се плаши од избори, затоа што знае дека ќе претрпи пораз
Заев ќе падне на предвремени избори и Тројанците во опозицијата нема да му помогнат во задржувањето на премиерското столче, реагираа од ВМРО-ДПМНЕ по денешната изјава на премиерот.
Откако Заев уште еднаш повтори дека ќе нема предвремени парламентарни избори заедно со локалните наесен, од опозициската партија му возвратија дека тој се плаши од избори, затоа што знае дека ќе претрпи пораз.
Од ВМРО-ДПМНЕ, исто така, велат дека Заев постојано се натпреварува во тоа како да излаже.
„Како на пример онаа лага која ја соопшти денес дека никогаш не кажал дека претседателот на Србија, Александар Вучиќ, е националист. На 2 мај 2017 година Заев изјави дека Вучиќ е националист. Денес на прес-конференција отворено лаже викајќи дека никогаш не рекол дека претседателот на Србија, Вучиќ, е националист“,
се наведува во реакцијата на ВМРО-ДПМНЕ.
Со тези за вонредни избори за пратеници денеска настапи и пратеникот на ВМРО-ДПМНЕ, Антонио Милошоски, при посета на Велес.
„Дали треба или не треба да има предвремени парламентарни избори најдобро укажуваат шпекулациите, но и сѐ поотворените изјави што ги даваат некои помали коалициски партнери на владејачкото мнозинство, кои ги опишуваат состојбите во државата како корумпирани и криминални. Затоа сметам дека за добробит на државата би било подобро во текот на октомври, за да биде и поекономично, заедно со локалните да се одржат и предвремени парламентарни избори“,
вели Милошоски.