Надзорот на изградбата на коридорите 8 и 10д треба да го прави конзорциум предводен од италијанската компанија ИРД, а во тимот со неа се и шпанска „Ептиса“, како и две домашни форми – „Евро консалтинг“ и „Електра солушн“
Јавното обвинителство да реагира, да отвори истрага и да побара запирање на работата на конзорциумот ИРД – Ептиса – Електра Солушн – Евро Консалтинг, повикаа од опозициската ВМРО-ДПМНЕ. Пратеникот Бојан Стојаноски денеска на прес-конференција наведе неколку факти кои, според него, укажуваат на коруптивна шема на вицепремиерот Артан Груби и премиерот Димитар Ковачевски со надзорот на изградбата на коридорите 8 и 10д.
1. Прво, власта распишува тендер за надзор на изградбата на коридорите 8 и 10д, тендерот го добива конзорциум воден од ИГХ, во чиј состав е Институтот за патишта – Велес на Сотир Ампов, договорот се раскинува затоа што конзорциумот не може да обезбеди банкарска гаранција поради фактот што сите пари, кои се руски, им се замрзнати.
2. Власта објавува нов тендер.
3. Во ек на постапката за доставување на понуди фирмата Електра солушн на Андон Ампов, син на Сотир Ампов вади лиценца за надзор, префрлајќи вработени од фирмата на татко му, кај која во првиот тендер е востановена руска врска.
4. Рокот за доставување на понуди се продолжува за 8 дена. Сѐ се вклопува совршено за Електра солушн да може да поднесе документи.
5. Покрај продолжување на рокот за поднесување на понуди, се менува и условот за фирмите кои ќе поднесат понуди да имаат позитивни финансиски биланси, и се овозможува и фирми загубари да достават понуди, како Ептиса, која влегува во Конзорциум со Електра солушн, Евро консалтинг и ИРД. Овој конзорциум го добива тендерот.
6. Шеста причина, смената на условите во постапката индицираат дека истите се направени за ИРД – Ептиса – Евро консалтинг – Електра солушн.
7. Ептиса е сопственост на кинеска фирма. Капиталот е во целост кинески. Менаџментот на Ептиса е кинески.
8. Ептиса, а преку неа Кинезите, ќе има увид во работата на Бехтел и нивната технологија.
9. Ептиса е фирмата во чиј конзорциум, заедно со Савеж во Ерменија, бил ангажиран Бранимир Димитријевиќ, сопственик на Евро консалтинг, третата фирма во конзорциумот. Бранимир Димитријевиќ во Ерменија е гонет за криминал од 1,8 милиони долари. Против него е подигнато обвинение, а тој избега од Ерменија со помош на дипломати во време кога со Владата управува СДС,
рече Стојаноски.
Ако ова не се доволни индиции за отворање на истрага, додаде Стојаноски, тогаш Абази нека почека, но потоа ќе мора да одговори и зошто молчел и дали и кого штител.
Надзорот на изградбата на коридорите 8 и 10д треба да го прави конзорциум предводен од италијанската компанија ИРД, а во тимот со неа се и шпанска „Ептиса“, како и две домашни форми – „Евро консалтинг“ и „Електра солушн“.
Еден од сопствениците на „Евро консалтинг“ е македонскиот државјанин Бранислав Димитријевиќ, кој, како што веќе објави „Призма“, е под истрага на ерменското обвинителство за изградба на патна инфраструктура во Ерменија, каде што бил ангажиран во конзорциум „Савеж–Ептиса“.
За „Ептиса“ која е дел од конзорциумот и за надзор на изградбата на македонските компании, како што објави Алсат ТВ, Владата на 24 ноември 2020 година донела одлука со која на сите државни институции и општини им забранила да ја ангажираат компанијата на тендери вредни над 1 милион евра поради незаконско, неетичко и неодговорно постапување во надзорот на работите на пругата Куманово – Белаковце, меѓутоа одлуката била укината околу 10 недели подоцна.
Првиот вицепремиер Артан Груби, кој го предводи Управувачкиот комитет за изградба на коридорите 8 и 10-д, пак, во јавните настапи тврдеше дека тоа всушност не е истата фирма, односно дека останало само името, а се сменила сопственичката структура. Меѓутоа, податоците од Централниот регистар, пак, го говорат спротивното – нема промена во сопственоста на „Ептиса“ од 2016 година, а премиерот Димитар Ковачевски минатата недела, одговарајќи на новинарски прашања на прес-конференција во Владата, им порача на новинарите ако нешто се сомневаат да пријават во обвинителство.
„Во однос на сопственички структури, може да се обратите до Централниот регистар. Штом имате какви било информации кои сметате дека се за вас сомнителни, веднаш да ги пријавите во институциите… Кога квалификувате некого, треба да имате за тоа и доказ врз основа на што го правите“,
рече Ковачевски.