Премиерот зборуваше и за обвинувањата од опозицијата дека преку компаниите за надзор на изградбата на коридорите 8 и 10-д се шири руско и кинеско влијание, при што порача дека тоа не е точно и таквите обвинувања, според него, немаат реална основа
Овој проект, вели тој, кога ќе започне, ќе ангажира огромен број македонски фирми и вработени во земјата, а ќе работат дополнително и странски експерти и работници со цел побрзо и квалитетно завршување на автопатиштата. Ако фалат работници, како што рече, ќе се донесат од странство
Тоа што Државната комисија за спречување корупција (ДКСК) отвори предмет во врска со компаниите што ќе треба да прават надзор на изградбата на автопатиштата од коридорите 8 и 10-д од страна на американско-турскиот конзорциум „Бехтел и Енка“ нема да ја одложи работата, смета премиерот Димитар Ковачевски.
„Бехтел и Енка“ кои треба да проектираат и да ги изградат автопатиштата, вели премиерот, потпишаа договор и тој е во сила.
„Прво, компанијата ‘Бехтел и Енка’ потпиша договор од над 400 страници со Владата кој е во сила и тие ќе почнат со проектирање и изведба на овој автопат. Ние досега сме работеле голем број инфраструктурни проекти кои биле правени по стариот принцип каде се работи посебно проектирање, па некогаш проектирањето трае со години, па потоа почнува изградба и проектот никогаш не завршува. Такви имате голем број низ Балканот. Овде станува збор за проектирање и изведба, каде она што испроектирала компанијата практично и го спроведува на терен и со тоа се забрзува работата на изведувањето на работите. Антикорупциска комисија нормално е да си ја работи својата работа во делот на она за што постојат сомнежи или одредени информации до нив. Меѓутоа, тоа не значи дека оваа работа што ја има ‘Бехтел и Енка’ ќе биде одложена“,
изјави денеска Ковачевски.
Надзорот треба да го прави конзорциум предводен од италијанската компанија ИРД, а во тимот со неа се и шпанска „Ептиса“, како и две домашни форми – „Евро консалтинг“ и „Електра солушн“.
Еден од сопствениците во „Евро консалтинг“ е македонскиот државјанин Бранислав Димитријевиќ, кој, како што веќе објави „Призма“ е под истрага на ерменското обвинителство за изградба на патна инфраструктура во Ерменија, каде бил ангажиран во конзорциум „Савеж-Ептиса“.
За „Ептиса“ која е дел од конзорциумот и за надзор на изградбата на македонските компании, како што објави Алсат ТВ, Владата на 24 ноември 2020 година донела одлука со која на сите државни институции и општини им забранила да ја ангажираат компанијата на тендери вредни над 1 милион евра поради незаконско, неетичко и неодговорно постапување во надзорот на работите на пругата Куманово – Белаковце, меѓутоа одлуката била укината околу 10 недели подоцна.
Првиот вицепремиер, Артан Груби, кој го предводи Управувачкиот комитет за изградба на коридорите 8 и 10-д, пак, во јавните настапи изминатите денови тврдеше дека тоа всушност не е истата фирма односно дека останало само името, а се сменила сопственичката структура. Меѓутоа, податоците од Централниот регистар, пак, го говорат спротивното – нема промена во сопственоста на „Ептиса“ од 2016 година, а премиерот Ковачевски денеска повторно им порача на новинарите ако нешто се сомневаат да пријават во обвинителство.
„Во однос на сопственички структури може да се обратите до централниот регистар. Штом имате какви било информации кои сметате дека се за вас сомнителни веднаш да ги пријавите во институциите … Кога квалификувате некого треба да имате за тоа и доказ врз основа на што го правите“,
рече денеска Ковачевски.
Премиерот одговараше и на новинарско прашање како ги коментира обвинувањата на опозицијата дека преку фирмите за надзор во земјава се шири руско или кинеско влијание, за што порача дека тоа не е точно.
Според него, таквите обвинувања немаат никаква реална основа и се дадени во очај на некој кои цело време зборувал дека во овој момент во државата ќе се организираа предвремени избори, а всушност тоа се случило било зголемување на владиното мнозинство.
„Ниту се шири руско влијание ниту пак се шири какво било влијание. Во светот на корпоративното работење постои соработка помеѓу корпорации кои се од различни држави и се од различни проекти. Јас ќе ве потсетам на една работа на која сум присуствувал, а можеби и вие сте присуствувале – тоа е отворањето на новиот погон на една компанија каде јас бев заедно со заменик-американскиот амбасадор и кинескиот амбасадор во државата бидејќи се работи за кинеска компанија која има седиште во САД и има капитал“,
рече Ковачевски.
Премиерот и денеска нагласи дека изградбата на автопатиштата од коридорите 8 и 10-д е најголемиот инфраструктурен проект што се случува во државата не само од независноста туку и во социјалистичка Македонија.
Овој проект, вели тој, кога ќе започне ќе ангажира огромен број македонски фирми и вработени во земјата, а ќе работат дополнително и странски експерти и работници со цел побрзо и квалитетно завршување на автопатиштата. Ако фалат работници, како што рече, ќе се донесат од странство.
„Согласно тоа дека е избран меѓународен реномиран проектант и изведувач тоа значи дека ќе има и работници за она што се јавува како недостаток кои ќе бидат донесени од странство и тоа е дел од работата на голем број меѓународни компании. Јас сум работел во меѓународни компании и како Македонец сум работел и во Хрватска, Австрија и Германија исто како и колеги од таму кои работеле заедно со мене тука во Македонија“,
изјави Ковачевски.