Без да даде дополнителни детали, претседателката на Централната изборна комисија, Ела Памфилова, изјави дека нападите успешно се одбиваат
Руските власти тврдат дека системите за онлајн гласање биле изложени на силен кибернапад во текот на ноќта, спроти вториот од трите дена гласање на парламентарните избори. Без да даде дополнителни детали, претседателката на Централната изборна комисија, Ела Памфилова, изјави дека нападите успешно се одбиваат.
Министерството за дигитален развој на Русија пријави обид за саботажа на комуникациска линија во пацифичките региони на земјата, но соопшти дека немало прекини во процесот на гласање.
Ова се првите парламентарни избори во Русија од почетокот на руската агресија врз Украина. На изборите учествуваат и жителите на Донецк, Луганск, Херсон и Запорожје – територии анектирани од Русија во 2022 година.
Денеска е вториот ден од тридневните избори за Државната дума во Русија, на кои граѓаните избираат претставници во Долниот дом на парламентот. Електронско гласање е овозможено во 33 региони во земјата, а за овој метод на гласање се регистрирани четири милиони избирачи. Партијата Единствена Русија, предводена од Владимир Путин, која е на власт повеќе од 20 години, очекува двотретинско мнозинство и покрај тешката економска криза, воениот замор и јавното незадоволство.