По завршувањето на сведочењето, Мицкоски пред судот одговараше и на прашања од новинарите, при што овој судски процес го нарече монтиран, сериозен и жесток со цел да се нанесе штета на ВМРО-ДПМНЕ и да се врши терор врз нејзини активисти и членови
Протестите беа организирано изразување незадоволство од страна на народот, од граѓани кои сами се организираа во тој период, на тие протести присуствував и јас, одев речиси секој ден и тоа беше реакција на тогашната политичка ситуација. Што се однесува до партијата, нормално разговаравме и дебатиравме, но ако прашањето е дали партијата ги организираше тие протести, мојот одговор е не, сведочеше лидерот на ВМРО-ДПМНЕ Христијан Мицкоски на денешното судско рочиште за организацијата на настаните од 27 април 2017.
Ова беше прво појавување на Мицкоски воопшто во судница како сведок, па затоа и самиот рече дека не му се познати правилата, а во судницата, вели, се обидел да биде вицкаст кога на судијата Илија Трпков му одговори дека „не е роднина и ваљда, не е скаран со некој од обвинетите“.
„Се обидов да бидам вицкаст и да внесам една доза на хумор во судницата бидејќи за првпат се појавувам во судница во својство на сведок, не сум бил досега во својство на обвинет. Една чудна атмосфера која јас за првпат ја гледам, и се обидов малце да внесам ведрина. Инаку, тоа се мои пријатели и не сум со никого замерен“,
рече Мицкоски по сведочењето.
На прашањата во судница одговараше кратко и негираше каква било поврзаност, не само на ВМРО-ДПМНЕ туку и на обвинетите поединци во врска со организацијата на протестите.
„Тоа е невозможно, тоа беше организирано незадоволство на народот од страна на народот“,
одговори Мицкоски на прашањето дали му е познато дека обвинетите ексминистри Спиро Ристовски и Миле Јанакиески учествувале во организацијата на протестите или нивно финансирање.
Во тој период лидерот на ВМРО-ДПМНЕ му беше советник на тогашниот премиер Никола Груевски, член на Извршниот комитет на партијата и генерален директор на ЕЛЕМ. Тој пред судот раскажа што тој правел конкретниот ден.
„Дента на 27 април 2017 имав состанок надвор од седиштето на компанијата со која менаџирав тогаш. На враќање назад кон работното место, бидејќи често останувам до доцна навечер на работа и често се движев пеш низ центарот на градот, забележав дека нешто се случува пред Собранието и се упатив натаму. Стигнав до влезната врата, но не влегов внатре во Собранието и тука отприлика завршив со активноста на протестите“,
рече Мицкоски.
Тој сведочеше по предлог на одбраната, а потоа прашање доби и од обвинителката Вилма Русковска.
„Кажавте дека критичниот ден сте протестирале пред зградата на Собранието, дали, бидејќи ги видовме и снимките како стоите пред вратата, можеме да заклучиме дека имавте намера да влезете внатре во Собранието?“,
праша Русковска.
По неколку приговори од адвокатите и преформулирање на прашањето, тој одговори:
„Протестите траеја неколку недели, месеци и беа на релација Влада-Собрание, и јас бев присутен и никогаш не влегов ниту во Владата ниту во Собранието и не можете да заклучите дека моето присуство тој ден било со намера да влезам со Собранието“,
рече Мицкоски.
Откако на прашања на адвокатите рече дека народот се самоорганизирал, за истото доби и прашања од судот, на што Мицкоски рече дека можеби граѓаните се организирале преку социјалните мрежи или на друг начин, но сигурно тоа не го организирала партиската структура.
Судијката Дијана Груевска, која е дел од судечкиот совет, го праша и дали мисли дека толкав број граѓани може да се самоорганизира, на што Мицкоски рече:
„Понекогаш бројките на протестите беа неколку стотини, неколку илјади, а ако која било структура стоеше зад тоа, верувајте бројките ќе беа поголеми“.
По завршувањето на сведочењето, Мицкоски пред судот одговараше и на прашања од новинарите, при што овој судски процес го нарече монтиран и политички, сериозен и жесток со цел да ѝ се нанесе штета на ВМРО-ДПМНЕ и да се врши терор врз нејзини активисти и членови. Неговата партија, рече, излегла губитни од „27 април“, а оние кои профитирале биле од СДСМ бидејќи потоа формирале влада.
„Јас ценам дека после 27 април сериозно загуби ВМРО-ДПМНЕ, а веднаш после тие настани влада направи СДСМ и Зоран Заев. Можеби тој одговор на ова прашање ќе ви послужи да истражите кој го осмисли сето тоа, кој го спроведе и зошто се случи. Никако тој што загуби од тој процес не може да биде ниту инспиратор, ниту сценарист, ниту оперативно да го спроведе. Јас би се задржал кој профитираше и кој имаше бенефит од сето тоа“,
рече лидерот на опозициската партија.
Новинарите го прашаа и дали тогаш имал контакт со Никола Груевски, кој инаку беше осомничен во истрагата за организацијата, но против него не беше покренато обвинение бидејќи е во бегство и е недостапен за органите на прогонот.
„Немав контакти во тој период, вечерта имавме Извршен комитет на партијата, тој дојде од пат и тоа беше единствениот контакт“,
одговори Мицкоски.
Покрај него, денеска во судот како сведоци се појавија и поранешниот вицепремиер Владимир Пешевски и други членови на партијата, како Лука Кржаловски, Ванчо Апостолов, Орце Ѓоргиевски и др.
Покрај споменатите ексминистри Ристовски и Јанакиески, обвинети за организацијата на крвавиот четврток се и поранешниот претседател на Собранието Трајко Вељаноски и бившиот директор на УБК, Владимир Атанасовски. Сите обвинети се товарат за делото терористичко загрозување на уставниот поредок и безбедноста.