Дали Славјанка Петровска денес ги загрози животите на десетици лица, наши сограѓани? Наместо во изолација како лице во потенцијален ризик за ширење на коронавирус таа држеше прес-конференција, прашуваат од ВМРО-ДПМНЕ.
Нивната реакција е на прес-конференцијата на која дополнителната заменик-министерка во МВР зборуваше за случајот „Боемска“ каде лидерот на опозициската партија беше „уловен“ во затворен дел од ресторан во Дебар Маало.
„Петровска за потребите на Заев држеше прес-конференција, иако со решение на ИЈЗ, како што објавија медиумите истата е упатена во домашна самоизолација. Дно на лицемерие е Славјанка да обвинува дека некој друг не се грижел за здравјето на граѓаните, а таа треба да седи дома затоа што е во самоизолација“,
велат од ВМРО-ДПМНЕ.
Ако таа има решение за самоизолација тогаш, нагласува опозицијата, таа ја прекршила владината Уредба (став 2, член 2) за примена на Законот за заштита на населението од заразни болести и сторила кривично дел.