Во непосредна близина на објектот, како и во самиот објект забележани се полициски службеници кои по описот на своите работни места не требало да бидат таму, по што биле повикани припадници на ЕБР, вели дополнителната заменик-министерка за внатрешни работи. Неофицијално, станува збор за командирот на „Тигрите“, Ивица Бисовски, кој се гледа со Мицкоски на снимката од теретаната
Едно од лицата со кои Христијан Мицкоски бил во кафеаната на улица „Боемска“ во скопско Дебар Маало е поранешен функционер, а сегашен службеник во Министерството за внатрешни работи, потврди дополнителната заменик-министерката за внатрешни работи, Славјанка Петровска.
Неофицијално, станува збор за екс-директорот на Управата за безбедност и контраразузнавање, Љупчо Андоновски. Тој сега е ангажиран како советник во кабинетот на актуелниот министер за внатрешни работи, Наќе Чулев.
На денешната прес-конференција, Петровска рече хронологијата на овој настан почнува со тоа што на 3 јуни околу 18:30 часот инспекторите од Државниот пазарен инспекторат извршиле вонредна контрола на угостителските објекти на улицата „Боемска“ во Дебар Маало, со цел да се утврди дали тие ги почитуваат новите мерки за спречување на ширењето на ковид-19. Таа вели дека со оглед на тоа што овие се редовни активности на инспекторите, тие претходно не побарале полициска асистенција.
Според она што Петровска го сподели со јавноста, вработени во „Чардак“ на инспекторите не им дозволиле да извршат надзор во внатрешниот дел, со образложение дека немаат клуч од тој дел. Кога инспекторите се оддалечиле од тој објект и заминале по другите објекти, забележале дека токму од внатрешноста излегуваат неколку лица.
Потоа, тие се вратиле во „Чардак“ и инсистирале да им биде овозможено да се изврши надзорот согласно законските прописи. Еден од очевидците повикал полиција на местото на настанот. Во меѓувреме, пристигнало лице кое се претставило како сопственик на кафеаната и го отворило внатрешниот дел, а инспекторите извршиле увид. Тие не затекнале гости, но имало употребени садови и чаши и остатоци од храна што, според Петровска, упатувало на тоа дека тој дел бил користен од некого.
Во непосредна близина на објектот, како и во самиот објект, забележани се полициски службеници кои по описот на своите работни места не требало да бидат таму, вели дополнителната заменик-министерка за внатрешни работи. Ова предизвикало сомнеж за нивната намера и, вели Петровска, со оглед на тоа што станува збор за фреквентно место, повикани се полициски службеници од Единицата за брзо распоредување (ЕБР) како превентивно обезбедување на просторот. Ова ангажирање е направено согласно законот за полиција и позитивните законски прописи кои важат во МВР, вели Петровска.
„Забележан е еден од началниците од одделот за специјални полициски операции кој во тоа време не бил работно ангажиран, а се нашол токму во близина на објектот, практично во непосредна близина до самиот објект“,
рече Петровска.
Неофицијално, станува збор за Ивица Бисовски, командир на специјалната единица „Тигар“, кој се гледа и на снимката со Христијан Мицкоски од теретаната, која кружеше по социјалните мрежи и за која се води постапка за да се утврди дали потекнува од периодот на епидемијата кога веќе беше на сила забраната за работа на теретаните.
Петровска најави дека ќе следуваат кривични пријави за сите што ги прекршиле мерките, но и соодветни пријави за попречување на работата на инспекторите. Таа рече дека се води постапка и за полициските службеници кои биле пред објектот, а во моментот не биле на работна задача.
Во врска со снимките од безбедносните камери на кафеаната таа потврди дека се обезбедени и дека се врши вештачење за утврдување на присутните лица.