За разлика од инспекторката Мери Проја Продановска, која соопшти дека нејзини колеги биле спречени да извршат увид во угостителски објект со образложение дека тој е од затворен тип и дека нема гости внатре, Мицкоски објави дека седел внатре во ресторанот и дека не бил доволно запознаен со новите протоколи
Лидерот на ВМРО-ДПМНЕ Христијан Мицкоски на својот профил на Фејсбук се огласи за денешниот инцидент во ресторан на Боемска улица, во кој биле спречени да извршат контрола пазарните инспектори.
Мицкоски признава дека седел во внатрешноста на ресторанот, но вели не бил доволно информиран за новите протоколи.
„Во услови кога имаме вистинска катастрофа од ширењето на корона заразата и целосно фијаско на власта која е дезориентирана и не е ефикасна, таа се занимава со тоа дали сум ручал внатре или надвор во ресторан, притоа комплетно покажувајќи го на дело нејзиното нечесно лице и инсталации. Дефокусирајќи ја јавноста со таа “епска битка” на специјалците од ЕБР, со вработените од ресторан, јавувајќи се по медиуми, да прават приказна од нешто каде нема и низа други дезинформации, со цел да се дефокусира вниманието од вистинската катастрофа со животите на граѓаните, предизвикана од неспособната власт. Да, точно е дека бев со двајца мои познаници во ресторан во Дебар Маало, прв пат по укинувањето на забраната за посета на угостителските објекти, поради што и не бев информиран доволно за новите протоколи. Ако тоа е мојот најголем грев и моја грешка и пропуст, јас тоа го признавам и подготвен сум да платам парична казна поради тоа. Не мислам дека луѓето не знаат да направат грешка, битно е грешката да не е таква да направи лошо некому, да наштети некому, да биде непоправлива“,
вели Мицкоски.
Тој посочува дека немал контакт со никој од државна инспекција или други државни органи,а во известувањето за настанот гледа обид за да се дефокусира јавноста.
„Жал ми е што денес, покрај погубните бројки на ново заболени и починати случаи, катастрофалното менаџирање со кризата од корона вирусот, економскиот дебакл на власта, кражбите на парите на граѓаните со милионски суми, рекетите, распродажбата на националните интереси, денеска тема стана и мојата средба со познаници во една Скопска кафеана. Човечки е да се згреши, и не сум лицемер кој едно говори пред камерите, а друго зад нив. Сакам да демантирам, дека имав било каков контакт со било кој од државната инспекција или органите на државата. Тоа се измислици за да се потхрани дефокусирањето на јавноста. И да бидам искрен, овој мој човечки грев, сметам дека е многу помал од состојбата која денес се случува врзана со губењето на животи и неодлучноста на владата која го загрижува здравјето на сите. Денес вистинската тема е што имаме 101 ново заразен и 4 починати. Власта сака да продаде приказна за да ја скрие вистината за себе, и фактот дека моето одење во ресторан не зарази никого, но нивната неспособност и СДСМ кластерот, да. Ако некој имаше дилема, сега е повеќе од јасно, кристално јасно дека власта и параполициските сили диригирани лично од Зоран Заев ме следат. И треба да знаат, Македонија не заборава, а сите тие ќе бидат поразени!“,
пишува Мицкоски.
Христијан Мицкоски вечерва беше затекнат во внатрешноста на угостителски објект, при обид на пазарната инспекција да изврши контрола. Пазарните инспектори останаа повеќе од два часа пред објектот зашто не им бил дозволен влез.