Народот плаќа поскапи сметки, и сето тоа затоа што Владата е арогантна и не ги послуша експертите и ВМРО-ДПМНЕ, реагира опозициската партијата
Сто дена влада на СДСМ и ДУИ – ароганција и дрскост кон народот, и нестабилност на економијата, реагираа од ВМРО-ДПМНЕ на денешниот владин форум организиран по повод 100 дена од формирањето на Владата на чело со премиерот Димитар Ковачевски.
„Изминативе 100 дена власта се однесува арогантно со народот. Цената на струјата е зголемена за 30 отсто, а на парното греење за 15 отсто. Народот плаќа поскапи сметки, и сето тоа затоа што владата е арогантна и не ги послуша експертите и ВМРО-ДПМНЕ кога даваа решенија за енергетската криза. Но, и заради криминалот во РЕК Битола и милионите евра во матни тендери. Владата е неспособна и затоа цените на брашното, лебот, зејтинот, млекото, горивата сите се зголемени во дијапазон од 70 до 100 отсто“,
пишува во реакцијата на ВМРО-ДПМНЕ.
Според опозицијата, досегашниот мандат на Владата го одбележало и тоа што нема откуп или има ниски цени на родот во земјоделството, како и кражба на оружје од полициска станица и на масло од марихуана во висина од два милиона евра.
Премиерот Ковачевски, пак, во своето обраќање на форумот рече дека деновиве читал коментари оти неговата влада немала среќа бидејќи од прв ден се соочила со големи предизвици – воена и економска криза, меѓутоа порача дека државата има среќа што ја предводи токму оваа влада.
„Среќа е што токму оваа Влада ја има одговорноста да се носи со сите овие предизвици. Среќа е затоа што, одговорно тврдам, дека за 100 дена донесовме тешки, принципиелни и пред сè државнички одлуки со кои ги штитиме граѓаните, нивниот стандард и нивните приходи. Докажавме дека со добар менаџмент, одговорно управување, со парите на граѓаните и чесна работа може да се надминат и најтешките предизвици“,
рече Ковачевски.