Вчера во Владата се разговарало за можни интервенции, по што вицепремиерот Битиќи најави дека една од мерките што ќе се преземат веројатно ќе биде производствените капацитети од прехранбената индустрија да влезат во регулираниот пазар на електрична енергија со пониска цена
Се предвидува инфлацијата до крајот на годината да биде 11,6 отсто, соопшти денеска вицепремиерот за економски прашања Фатмир Битиќи.
Битиќи потсети и дека во септември инфлацијата била околу 18,6 отсто и најави анализа за причините, односно дали е таа целосно инфлација која е направена само од еден сегмент или е увозно зависна.
„Таа не е мотивирана само од прехранбените продукти и растот на цените, туку и од други варијабли. Просекот којшто ние го предвидуваме до крајот на годината е инфлацијата да биде околу 11,6 отсто“,
рече вицепремиерот.
Според неговата изјава, во Владата вчера се разговарало да се интервенира со цел да се прекине зголемувањето на цените, а една од можните мерки е сите производствени капацитети, особено од прехранбената индустрија, да влезат на регулираниот пазар со пониска цена на електрична енергија.
„Ние вчера на седница на Владата разговаравме за одредени можеби неконвенцијални или непрактични мерки, а тоа е како евентуално преку интервенции да го прекинеме овој синџир на зголемување на цени. Една од мерките која најверојатно ќе ја дадеме, а тоа е сите производствени капацитети, особено во прехраната да влезат на регулираниот пазар со пониска цена на електрична енергија, за електричната енергија да не влијае дополнително на понатамошно зголемување“,
изјави денеска Битиќи од Битола.