Владата објави јавен повик за интервентна набавка на заштитни маски со цел спречување на последиците од коронавирусот за време на вонредната состојба. Согласно повикот, маските треба да бидат за повеќекратна употреба.
Право на учество на јавниот повик, како што се посочува, имаат сите домашни производители кои ги исполнуваат условите од овој повик, и тоа: испорака на најмалку 2 000 маски дневно, испораката да се врши за период на траење на вонредната состојба, на различни локации во Скопје, единечната цена по маска да изнесува максимум 40 денари, плус данок на додадена вредност за маските изработени од материјал за изработка во сопственост на економскиот оператор, единечната цена по маска да изнесува максимум 25 денари, плус данок на додадена вредност за маските изработени од материјал обезбеден од страна на Владата, за материјалот од кои ќе се изработуваат заштитните маски потребно е да се достави извештај од извршена лабораториска анализа издаден од страна на овластена лабораторија, со примерок од маската во прилог.
Економските оператори, понудувачите на овој јавен повик е потребно да ги достават следните документи: Документ за регистрирана дејност (ДРД-образец), извештај од извршена лабораториска анализа од овластена лабораторија, во однос на квалитетот на маските, примерок од маските што ќе се доставуваат и изјава од понудувачот дека може да врши испорака на најмалку 2 000 маски дневно.
„За способноста на понудувачите, одлучува Комисија составена од пет члена од редовите на Владата на Република Северна Македонија – Генералниот секретаријат, министерствата за политички систем и односи меѓу заедниците, за здравство, за информатичко општество и администрација и за внатрешни работи, кои ќе извршат оценување на способноста на понудувачите согласно бараните услови во повикот и ќе предложат избор до Одговорното лице. Владата – Генерален секретаријат, ќе склучи договор со сите понудувачи кои ги исполнуваат условите“,
информираат од владината-прес служба.
Испораката на 2 000 маски дневно, како што се нагласува, ќе биде реализирана на еднакви делови, односно сразмерно на бројот на понудувачи со кои ќе се склучи договор. Лица назначени од страна на договорниот орган ќе вршат квалитативна и квантитативна проверка при испораките.
„За неисполнување на склучен договор, на економскиот оператор ќе му биде наплатена договорна казна согласно склучен договор и ќе се има предвид при докажување на способноста за неисклучување од постапка при спроведување на редовни јавни набавки. Плаќањето ќе се врши по достава на фактура и испратници за извршена испорака во архивата на Договорниот орган – Влада на Република Северна Македонија – Генерален секретаријат, со седиште на бул. ‘Илинден’ бр. 2, Скопје, во рок од 60 дена од денот на приемот“, се наведува во соопштението.
Понудите се доставуваат во затворен плик, по пошта или лично до архивата на Договорниот орган на следната адреса: Влада на Република Северна Македонија – Генерален секретаријат, бул. „Илинден“ бр.2, 1000 Скопје, најдоцна до 27.04.2020 година до 15:00 часот. Понудите кои нема да бидат доставени во предвидениот рок нема да бидат разгледувани.
„За дополнителни информации, понудувачите може да се обратат до Владата на Република Северна Македонија – Генерален секретаријат на телефон 02/3118-022, а Јавниот повик е објавен на веб-страницата на Владата на Република Северна Македонија: https://vlada.mk/node/21153 “, стои во соопштението.