Од Владата велат дека М-НАВ ги информирала оти потребниот тест за контролори на летање го положиле тринаесетмина кандидати. Од нив, како што е информирано, за осумтемина кои се стекнале и со лекарско уверение, биле дадени насоки за вработување и нивно упатување на школување
Владата информира дека на денешната редовна седница, меѓу другото, го разгледала и извештајот и облазложенијата од М-НАВ во врска со процесот за селекција и обука на кандидати за контролори на летање согласно јавниот оглас објавен од М-НАВ.
Од претставниците на М-НАВ било посочено оти постапката за селекција на канцидати за контролори е реализирана согласно законски утврдени процедури, а селектираните кандидати, кои се и вработени во М-НАВ ги положиле селекциските тестови според меѓународни стандарди.
„За нивната професионална стручност зборува и фактот што по положените тестови, може да конкурираат за работа и во која било друга странска држава“,
посочиле претставниците од М-НАВ.
До Владата биле доставени и информации за утврдување на потреба за регрутирање и селекција на кандидатите, при што било посочено дека тоа е согласно Годишниот план за работа на М-НАВ и Планот за јавни набавки на М-НАВ за 2022 година. Била доставена информација и за спроведувањето на јавната набавка и склучениот договор со економскиот оператор „Гејт авиејшн тренинг“ од Данска, за селекција, почетна обука и обука за ADI TWR рејтинг за осум кандидати за контролори за летање.
„Беше објаснето дека регрутацијата и селекцијата на кандидати за контролори на летање е реализирана согласно донесениот Акционен план, со цел, како што беше објаснето, овозможување на сите инволвирани поедноставно следење на временските рамки на процесите поврзани со регрутација и селекција на кандидати за контролори на летање“,
се додава во соопштението од Владата.
До Владата биле доставени и информации околу објавувањето на јавниот оглас од М-НАВ, за селекцијата на кандидатите за контролори на летање, за што, како што се посочува, бил изготвен временски план и била спроведена селекција во соработка со данскиот оператор „Гејт авиејшн тренинг“.
Притоа, била доставена предлог-ранг листа на најуспешни кандидати околу тестот за претселекција и тестирањето со FEAST тестот (First European Air Traffic Controller Selection Test).
„При што, FEAST II тестот и потоа FEAST III тестот го положиле тринаесетмина кандидати. Од нив, како што е информирано, за осумтемина кои се стекнале и со лекарско уверение, биле дадени насоки за вработување и нивно упатување на школување“,
додаваат од Владата.
Раководството на М-НАВ пред четири дена го прифати изборот на кандидати за обука за контролори на летање, предложен од Комисијата за избор и селекција и даде насоки за нивно вработување на определено време и упатување на школување.
Претходно, претседателот на Струковиот синдикат на контролори на летање (ССКЛ), Александар Тасевски, изрази сомнеж дека во државната компанија има планови за поништување на огласот бидејќи не биле избрани кандидати блиски на менаџментот и на функционери. Синдикатот најави дека ќе бара одговорност за случувања со кои сметаат дека се нарушил кредибилитетот на нивната професија.