Пратеникот од ВМРО-ДПМНЕ, повикувајќи се на дипломатски извори од МНР, објави на Фејсбук дека последниот предлог на официјална Софија е дека премиерите Заев и Борисов за време на предвидената средба на 11 ноември во Бугарија би требало да се согласат дека Гоце Делчев е Македонец во регионална смисла на зборот, но во смисла на народно-етничката припадност е Бугарин роден во географската област Македонија
Владата ги оценува како невистина и ги отфрла шпекулациите за наводни предлози за дефиниција на идентитетската припадност на Гоце Делчев на кои би требало да се согласат премиерите Зоран Заев и Бојко Борисов, кои денеска на својот фејсбук-профил ги сподели како информација пратеникот од ВМРО-ДПМНЕ, Антонијо Милошоски, повикувајќи се на извори во МНР.
„Таков предлог не постои ниту, пак, бил предмет на дискусија, а изнесеното тврдење на пратеникот Милошоски е груба шпекулација и само му нанесува штета на процесот што го води заедничката македонско-бугарска комисија за историски и образовни прашања“,
велат од Владата за МИА.
Дипломатски извори во МНР споделуваат дека последниот предлог на официјална Софија е дека премиерите Заев и Борисов за…
Posted by Antonio Miloshoski on Monday, October 19, 2020
„Дипломатски извори во МНР споделуваат дека последниот предлог на официјална Софија е дека премиерите Заев и Борисов за време на предвидената средба на 11 ноември во Бугарија би требало да се согласат на следнава дефиниција за Гоце: ‘Гоце Делчев е Македонец во регионална смисла на зборот, но во смисла на народно-етничката припадност Гоце Делчев е Бугарин роден во географската област Македонија’. Оваа дефиниција потоа би се применила и на многу други историски личности, како Даме Груев, Никола Карев, Ѓорче Петров, Панко Брашнаров, Киро Глигоров и други. Веројатно ова е една од причините зошто Заев одбива и собраниска и политичка-лидерска дебата околу националните позиции на Македонија во однос на договорот за добрососедство со Бугарија, пред закажаната посета на Софија“,
напиша Милошоски на Фејсбук.
Од Владата за МИА нагласуваат дека сите дискусии поврзани со личности и настани од историјата се водат преку заедничката мултидисциплинарна експертска комисија за образовни и историски прашања.