Во новиот Заклучок од владина седница се наведува дека, по исклучок, ако има потреба од итна и неопходна јавна набавка, таа треба да се спроведе исклучиво по претходна согласност од Владата
Владата ги повика државните и јавни институции и претпријатија да се воздржат од несуштински јавни набавки, односно да не купуваат мебел, возила, опрема…
Како што соопштија од Владата, на вчерашната седница, е донесен нов Заклучок, со кој се задолжуваат сите органи на државната управа, јавните претпријатија основани од државата, акционерските друштва во државна сопственост, агенции , фондови, бироа, заводи, управи и сите други државни институции да се придржуваат до забраната за спроведување несуштински јавни набавки. Тоа им се препорачува и на единиците на локална самоуправа, јавните претпријатија основани од единиците на локалната самоуправа и другите институции од јавниот сервис.
Како што се наведува во Заклучокот, по исклучок, доколку постои итна и неопходна потреба од ваква јавна набавка, во насока на нормално и непречено функционирање на институциите и извршувањето нивната надлежност, тогаш таа да се спроведе исклучиво по претходна согласност од Владата.
„Согласно со ова, сите наведени институции да ги потпишуваат договорите за кои се завршени постапките за јавни набавки и за кои имаат обезбедено средства во рамките на буџетите и согласно со планот за јавни набавки, имајќи ја предвид Одлуката за прераспределба на средства меѓу буџетските корисници на централната власт и меѓу фондовите. Другите јавни набавки институциите да ги спроведуваат во рамките на буџетот на соодветната институција имајќи ја предвид Одлуката за прераспределба на средства меѓу буџетските корисници на централната власт и меѓу фондовите и согласно со планот за јавни набавки“,
се додава во Заклучокот.