Во соопштението од вечерашната седница на Владата нема информација дека е побарано продолжување на вонредната состојба. Нема таква одлука ниту од претседателот Пендаровски
Владата, на седницата одржана вечерва, донесе повеќе одлуки, но во соопштението нема информација дали се расправало и за тоа да се предложи продложување на вонредната состојба, која завршува вечерва на полноќ, согласно со четвртата одлука на претседателот Стево Пендаровски.
Нема ниту информација за евентуална измена на Уредбата за изборите, според која гласањето би требало да се реализира 22 дена по завршувањето на вонредната состојба, што во случајов би значело на 5 јули, така што ДИК уште утре треба да усвои ревидиран роковник за спроведување на изборните дејствија.
Одлуки што се донесени на вечерашната седница
Владата донесе повеќе одлуки, меѓу кои и Протоколот за непречен транзит на странски државјани низ територијата на Северна Македонија, кој утврдува дека државјаните на други држави кои транзитираат низ територијата на земјата, можат, до целосната либерализација на режимот за влез и излез, да ги користат следните гранични премини: „Табановце“, „Деве Баир“, „Богородица“, „Ќафасан“, „Блаце “ и аеродром „Скопје“. Транзитот на овие лица подразбира влез на еден граничен премин и излез на друг со обврска при транзитот да не се излегува од соодветниот автопат или локален пат и тој да се реализира во рамките на најмногу 5 часа што се потврдува со изјава која странските државјани треба да ја пополнат на влез, а на излез треба корисникот да ја предаде на граничната полиција со цел да се контролира времетраењето на транзитот.
Владата ја усвои информацијата на Развојната банка на Северна Македонија за барањата кои ги исполнуваат критериумите од Јавниот повик бр.1 за кредити од кредитната линија од компензациските фондови од странска помош, со цел намалување на последиците од коронавирусот и ја задолжи банката да склучи договори за кредит со кредитобарателите кои ги исполнуваат критериумите, односно со 476 компании со барања за поддршка во висина од 316.038.500 денари. Во врска со овие информации на Развојната банка на Северна Македонија, Владата донесе заклучок да се разгледаат можностите за обезбедување дополнителни средства заради големиот интерес од компаниите за овие мерки.
На оваа седница, Владата донесе измени на Уредбата со законска сила за примена на Законот за задолжување на Северна Македонија со заем кај Меѓународната банка за обнова и развој – Светска банка ,по Договорот за заем за финансирање на Проектот за поврзување на локални патишта за време на вонредна состојба, со кои, по претходна согласност од Светска банка, се овозможува преостанатите средства до 37 милиони евра од овој заем да се пренаменат за исплата на плати на работниците за месец јуни 2020 година, согласно мерката за финансиска поддршка за исплата на платите во висина од 14.500 денари.
Владата ја разгледа информацијата и ја утврди потребата од проверка на веродостојноста на дадените податоци до Генералниот секретаријат на Владата, согласно со Уредбата со законска сила за финансиска поддршка на граѓани и вработени лица со низок доход, млади лица и здравствени работници преку издавање на домашна платежна картичка наменета за купување македонски производи и услуги за време на вонредна состојба.
Донесени се и измени на Уредбата за финансиска поддршка на граѓани и вработени лица со низок доход, млади лица и здравствени работници преку издавање на домашна платежна картичка наменета за купување на македонски производи и услуги за време на вонредна состојба, согласно која криптираните податоци содржани во листите на корисници на финансиска поддршка согласно со оваа уредба со законска сила, се доставуваат на чување во Државниот архив, врз основа на записник за секое примопредавање на податоците, подготвен од страна на тричлена комисија што ја формира генералниот секретар на Владата, од редот на административните службеници во Генералниот секретаријат . Уредбата определува дека за веродостојноста на податоците содржани во листите на корисници на финансиска поддршка, одговорни се институциите кои ги доставиле.