Лидерот на СДСМ рече дека отстапува од 5 јули како изборен термин, затоа што и ВМРО-ДПМНЕ се залагала за избори во работен ден. На Мицкоски му порача дека со тоа ја прави последната отстапка
Отстапувам од избори на 5 јули, изјави, денеска во Струмица, лидерот на СДСМ Зоран Заев, повикувајќи ја Владата до крајот на денот да побара од претседателот Стево Пендаровски уште едно продолжувањае на вонредната состојба, но само за три дена, за изборите да може да се одржат на 8 јули (среда).
Откако синоќа заврши без договор средбата на Заев со лидерот на ВМРО-ДПМНЕ, Христијан Мицкоски, во претседателскиот кабинет, се очекуваше денеска двајцата партиски лидери да ги продолжат консултациите за приближување на ставовите во текот на денот. Но Заев се јави попладнево од Струмица, каде што присуствуваше на увид во завршните работи на новото болничко крило на болницата, заедно со премирот Оливер Спасовски и министерот за здравство, Венко Филипче.
„Јас нема да робувам на 5 јули и да се држам фиксно до овој датум. Имајќи предвид дека и Мицкоски и јас повеќепати спомнувавме дека поприфатливо е изборите да се одржат во среда како неработен ден, еве отстапувам од 5 јули и согласен сум изборите да бидат на 8 јули среда, а во понеделник и вторник ќе гласаат болните и изнемоштените, граѓаните во самоизолација или се хоспитализирани во болница, повозрасните граѓани“,
изјави Заев.
Тој ја повика опозицијата на одговорност, рационалност и конструктивност.
„Многу важно е да имаме навреме избор,и за да си ги вратиме институциите и тие да му служат на народот со полн капацитет. Институциите се за сите граѓани – и за тие што ја поддржуваат власта и за тие што ја подржуваат опозицијата, како и за тие што никого не поддржуваат. Затоа е многу важно учеството на опозицијата. Апелирам на одговорност, на рационалност и на конструктивност. Ова не е време како порано кога на претходната власт ѝ одговараа избори без опозиција. Демократијата во која живеме бара активно учество на опозицијата“,
истакна Заев.
Повтори дека изборите треба да бидат во разумен рок, со цел есента да се дочека со активно Собрание и со политичка влада со полн легимитет.Мораме, рече, да ја дочекаме сесента подготвени.
На Мицкоски и на раководството на ВМРО ДПМНЕ, како што рече, им порачува дека ја прави последната отстапка, нагласувајќи дека правел отстапки од крајот на декември досега.
„Ако се прифати 8 јули, ќе го замолам претседателот на Владата и министрите да се соберат доцна во текот не денот и донесат предлог за продолжување на вонредната состојба од три дена, овој пат заради договор со опозицијата, бидејќи немаме аргументи заради економски причини да бараме вонредна состојба. Но, тие три дена ќе дадат правно разрешување на можноста, токму на 8 јули да одиме заедно на избори“,
рече претседателот на СДСМ.