Трошоците за СЈО за стручните служби и за комуналии до престанокот на постоење на ова обвинителство, подобро е да се платат на време отколку по судски пат со камати, велат од Владата.
Ваквата реакција на Владата следува откако ВМРО-ДПМНЕ го обвини СДСМ дека без никаков срам носи Уредба да се исплатат средства на вработените во СЈО кое, според опозицијата, е добро познато дека работи во корист на социјалдемократите.
Според одговорот од Владата на опозициските обвинувања, станува збор за Уредба со законска сила донесена на 2 април. Според објаснувањето од владината прес-службата, уредбата ги регулира прашањата согласно новиот Закон за јавно обвинителство кој ќе почне да се применува на 30 јуни годинава, кога СЈО ќе престане да постои. Од таму потсетуваат дека обвинителите кои работеа во СЈО веќе извесен период се вратени на работа во матичните обвинителства, додека во оваа институција во моментов работат само стручните служби, како што се јавнообвинителските службеници и техничкиот персонал кои имаат важечки договори.
„Исто така, постојат комунални трошоци за зградата во која е сместено СЈО. Сите овие трошоци, дали се за плати за стручните служби или за комуналии, се засновани врз важечки и валидни договори и мора да бидат подмирени. Граѓаните треба да знаат дека доколку државата дозволи овие трошоци да бидат наплатени по судски пат, во тој случај средствата кои би биле платени од Буџетот би биле многу поголеми заради каматите, судските и адвокатските трошоци. Владата оцени дека порационална опција е обврската која во секој случај ќе биде платена од Буџетот, да биде платена надвор од судска постапка и со помало чинење за Буџетот“,
велат од Владата.
Оттаму посочуваат дека не станува збор за одделување нови или дополнителни пари туку за веќе планирани средства кои се однесуваат само на платите на вработените службеници и на комуналните трошоци, за кои нема кој да потпише да се исплатат, бидејќи Катица Јанева беше единствен овластен потписник.
„Со оглед на тоа што за овие лица кои се вработени во СЈО немаше овластен потписник, тие не можеа да го остварат ниту правото на прекин на работниот однос, ниту пак да се вратат во институциите од кои беа преземени. Со оваа уредба се овозможува јавниот обвинител на Република Северна Македонија да може да одлучува за правата од работен однос за овие лица. И на крајот, со оваа уредба дадена е можност истражителите да бидат распределени во други јавни обвинителства или вратени во МВР или во други институции во кои се вработени со цел нивно продуктивно ангажирање“,
појаснуваат од Владата.
Покрај партиското соопштение од ВМРО-ДПМНЕ, на оваа тема зборуваше и Христијан Мицкоски на денешната прес-конференција, кој рече дека бил згрозен кога ја добил информацијата.
„Замислете, приоритет имаат тие неколкумина дечиња на слугите во судството и обвинителството на СДСМ на сметка на сите оние медицински лица, сите оние доктори кои се во првата борбена линија и се справуваат со оваа пандемија голораки. Навистина не можам ниту како човек, ниту како политичар да кажам освен тоа дека ми се гади од ваквиот начин на злоупотреба на чувствата на луѓето и она со кое што денеска се соочуваат македонските граѓани, македонската нација, останатите граѓани кои што живеат во Македонија“,
рече Мицкоски.