Од Владата велат дека сите институции имале целосен и детален увид во планот за распределба на административните работници преку програмата К-5 или во јавноста познати како вработени по Рамковен договор. Тие велат дека директорот на Државниот пазарен инспекторат (ДПИ), Стојко Пауновски, бил писмено известен за сите детали во врска со оправданоста на распределбата и дека тој не ја почитувал законската обврска.
„Членот 5 од Законот за преземање на административни службеници вработени преку K-5 програмата во Министерството за политички систем и односи меѓу заедниците, е донесен во декември 2020 година, утврдува дека раководните лица во институциите, се должни да ја започнат постапката за усогласување на актите за систематизација на работните места со одредбите од овој закон во рок од 30 дена од денот на усвојувањето на Планот за преземање. Ова го прифатија 237 институции. Директорот на Државниот пазарен инспекторат беше писмено известен за сите детали и информации во врска со оправданоста и начинот на распределбата и за тоа дека не ја почитува законската обврска, односно дека во законскиот рок не го прилагодил актот за систематизација на работни места во оваа институција што е дел од постапката за мобилност преку преземање на дел од нераспоредените административни службеници“,
велат од Владата.
Според планот, ДПИ треба да преземе 32 вработени, од кои 29 на работно место помлад соработник и тројца на работно место помлад референт. Од Владата велат дека при изготвувањето на Планот за распределба, Министерството за политички систем и односи помеѓу заедниците го имале предвид фактот дека видот на образование на вработениот кој се презема треба да биде соодветен на надлежноста на институција во која се презема, односно да ги исполнува општите и посебните услови утврдени во актот на систематизација на работни места во институцијата во која се распоредува.
„Членот 12 ги утврдува условите за инспектор и определува дека инспекторот треба да има завршено образование од соодветната област што се докажува со уверение. Оттаму, од увидот во образовниот профил на лицата кои се опфатени во Планот за распределба е утврдено дека 24 вработени кои треба да бидат преземени на работни места од категорија помлад соработник, ги исполнуваат општите, посебните услови, односно условот видот на образование да биде соодветен на описот на работното место. Ова значи дека овие лица може да бидат преземени како административни службеници“,
сооштија од Владата.
Директорот на ДПИ, Стојко Пауновски, пак рече дека нема да ги прифати распределените административни работници, бидјеќи во институцијата што ја води потребни се инспектори. По неговото негодување, премиерот Зоран Заев изјави дека очекува од вицепремиерот Љупчо Николовски да даде предлог за разрешување на Пауновски. Во меѓувреме, речиси сите вработени во ДПИ потпишале петиција со поддршка на Пауновски, а најавија дека во понеделник ќе испратат и писмен допис до Владата со барање за средба со цел да не се реализира најавата за разрешувањето на нивниот директор.
Од Владата, остануваат на ставот дека со процесот на распределба ќе се реши децениски проблем и додаваат дека со преземањето на вработените нема да има финансиски импликации врз Буџетот на С Македонија, бидејќи станува збор за вработени за кои веќе се обезбедени финансиски средства.
„Почитувањето на законите и утврдните постапки врз основа на законските одредби се темел на кој се заснова политиката на оваа влада. Тоа е обврска за сите што се дел од институциите, особено за носителите на одговорни раководни функции“,
велат од Владата.