„Согласно овие цитирани членови, судот првообвинетиот Виктор Милановски го осудува на казна затвор во траење од пет години и десет месеци, во која му се смета и притворот од 13.3.2023 година, а на обвинетиот Саша Челикиќ му се определува казна затвор од две години и два месеци, во која му се смета и притворот од 13.3.2023 до 11.7.2023 година, рече денеска судијката Славица Наумова Јосифовска
Вкупно осум години затвор им пресудил Основниот Кривичен суд Скопје на обвинетите Виктор Милановски и Саша Челичиќ против кои се водеше процес за грабнување на Самоил Костадиновски, внук на политичарот и лидер на Обединети за Македонија, Љубе Бошкоски.
Според Кривичниот законик, двајцата обвинети беа прогласени за виновни за сторено кривично дело грабнување, за кое е предвидена казна од една до десет години.
Според судијката Славица Наумова Јосифовска, обвинетите Виктор Милановски и Александар Трпков, кој е недостапен на органите на прогон се виновни затоа што на 3 март 2023 година на улицата „Христо Татарчев“ во Скопје заеднички извршиле грабнување со закана дека ќе го лишат од живот оштетениот Самоил Костадиновски, со цел, како што и рече таа, да се плати претходно украдена наркотична дрога – роба, за која оштетениот требало да ја плати, но не ја платил и не ги предал паричните средства, дека според судијката, обвинетиот Саша Челичиќ со умисла им помогнал во извршување на кривичното дело – грабнување.
„Согласно овие цитирани членови, судот првообвинетиот Виктор Милановски го осудува на казна затвор во траење од пет години и десет месец во која му се смета и притворот од 13.3.2023 година, а на обвинетиот Саша Челикиќ му се определува казна затвор од две години и два месеци, во која му се смета и притворот од 13.3.2023 до 11.7.2023 година“,
рече судијката.
Основното јавно обвинителство (ОЈО) Скопје поднесе обвинение против две лица за случајот со грабнувањето на Самоил Костадиновски, внук на политичарот и лидер на Обединети за Македонија, Љубе Бошкоски.
Едно од лицата е осомничено за делото грабнување, а второто за помагање. Во истрагата опфатено е уште едно лице кое е во бегство, но постапката за него привремено е прекината до негово пронаоѓање и приведување.
Во соопштението кое го објави ОЈО Скопје, се наведува дека причината за киднапирањето е да го натераат Костадиновски да плати за 4 килограми хероин.
„На 3 март, на улицата ’Христо Татарчев‘, првообвинетиот, заедно со лицето кое се наоѓа во бегство и други непознати лица, извршиле грабнување на едно лице, со закана дека ќе го лишат од живот. Намерата им била да го натераат оштетениот да плати претходно украдена наркотична дрога – хероин во количина од 4 килограми“,
изјавија пред половина година од Обвинителството.
Тие го грабнале со автомобил „волво В40“ кој им го обезбедил второосомничениот што со обвинението се товари за помагање. Ова возило потоа било запалено во Драчево со цел да се прекријат трагите.
„Со возилото обвинетите го однеле оштетениот на непознато место спротивно на неговата волја. Во следните неколку дена, преку пораки на мобилни апликации од непознати испраќачи, членови на семејството и блиски лица на оштетениот добивале пораки со барање за уплата на средства за наводно преземена, а неисплатена наркотична дрога“,
велат од Обвинителството.