Тој во изјавата што ја пренесува агенцијата „Фокус“ не прецизира од кои и какви изјави и постапки треба да се воздржат македонските политичари, но, имајќи го предвид нивниот редослед, пратеникот најверојатно алудира на вчерашната изјава на претседателот на С Македонија, Стево Пендаровски, во врска со предлогот за забрана за влез во земјава на европратеник од Бугарија и уште неколку бугарски државјани
Пратеникот од редовите на бугарската Социјалистичка партија, Кристијан Вигенин, денеска на брифинг со новинарите во бугарскиот парламент ги повика властите во С Македонија да се воздржат од изјави и постапки кои не водат кон решавање на проблемите туку, напротив, кон нивна ескалација.
Тој во изјавата што ја пренесува агенцијата „Фокус“ не прецизира од кои и какви изјави и постапки треба да се воздржат македонските политичари, но, имајќи го предвид нивниот редослед, пратеникот најверојатно алудира на вчерашната изјава на претседателот на С Македонија, Стево Пендаровски.
„Ги повикуваме и властите во РСМ, како и водечките политичари и партии, да се воздржат од изјави и постапки кои не водат кон решавање на проблемите, туку до неприфатлива ескалација, која долгорочно може да го влоши дијалогот меѓу двете земји“,
рече Винегин.
Настаните во последните неколку дена во односите меѓу С Македонија и Бугарија, посочува тој, ја потврдува исправноста на ставот на БСП да не го поддржи укинувањето на ветото во однос на преговорите на земјава со ЕУ за членство во организацијата.
За случајот со физичкиот напад на секретарот на бугарскиот клуб „Цар Борис Трети“, Христијан Пендаков, Вигенин смета дека не станува збор за криминален случај туку дека „мотивацијата за ова злосторство се крие зад систематското всадување омраза кон Бугарија и кон македонските граѓани со бугарски идентитет“.
„Најостро го осудуваме овој случај и бараме бугарските власти да преземат поактивен и посеопфатен пристап во однос на РСМ – пред сè да се спротивстави на говорот на омраза во РСМ, да ги заштити правата на македонските граѓани со бугарска самосвест. Да извршиме притисок со помош на нашите партнери од ЕУ, за строго спроведување на преземените обврски од РСМ, како кон Бугарија, така и кон ЕУ“,
рече Вигенин.
На иста линија со пратеникот на БСП и е копретседателот на Продолжуваме со промените, Асен Василев, кој вели дека Бугарија мора да ја искористи целата моќ на Европската Унија и да ја принуди С Македонија да ги почитува правата на бугарските граѓани таму.
Василев, цитиран од БТА, ова го изјавил одговарајќи на новинарско прашање за предлогот за забрана за влез на европратеник од Бугарија и уште неколку бугарски државјани во земјава.
„Полугите на целата европска дипломатија се во рацете на нашите дипломати и мораме да организираме сериозен одговор дека тоа не е проблем само меѓу Бугарија и Македонија, тоа е проблем на Македонија со целата Европска Унија“,
коментира Василев.
Тој рече дека се чини дека Северна Македонија нема да го започне пристапниот процес додека Бугарија и ЕУ не се погрижат бугарските граѓани да бидат заштитени.
Шефот на државата Стево Пендаровски вчера по седницата на Советот за безбедност соопшти дека ќе ѝ предложи на Владата да им забрани влез на еден пратеник од Бугарија во Европскиот парламент и на неколку други лица – државјани на Бугарија поради дејствија што претходно ги презеле и сè уште ги преземаат против нашата држава.
Сепак, најдиректен и провокативен во реакциите на предлогот на Пендаровски беше европратеникот Ангел Џамбаски на кого и се однесува барањето за забрана за влез во земјава, иако не беше експлицитно посочен од претседателот на државата.
„Забраната нема да ја избрише вистината дека Македонија била и е бугарска“,
напиша Џамбаски на социјалните мрежи.
Бугарскиот парламент денеска ја одложи расправата за односите со С Македонија откако во законодавниот дом не се појави техничкиот министер за надворешни работи на земјата кој требаше, според најавите, да реферира за случајот со нападот на секретарот на бугарскиот клуб „Цар Борис Трети“ во Охрид и воопшто за нападите врз Бугарите во Македонија.
Наместо Милков, пред бугарските парламентарци се најде претседателката на Централната изборна комисија, Камелија Нејкова, откако пропадна и третиот обид за формирање на редовна влада во земјата, поради што на дневен ред во Бугарија се врати прашањето за датум на одржување на нови претседателски избори – петти во последните две години.