Дел од револтираните наставници побараа синдикалниот лидер да не ги потенцира тие 18 отсто покачување на платата бидејќи, како што велат, тие не им се важни туку она што е основна причина за нивното незадоволство е непочитувањето на колективниот договор
Свирежи и скандирање – „оставка, оставка“ се слушаа пред седиштето на Синдикатот за образование, наука и култура (СОНК) каде дел од членството попладнево се собраа да искаже револт од одлуката на раководството да се стави штрајкот во мирување.
Тие бараат претседателот на СОНК, Јаким Неделков, да излезе пред нив и да објасни што значи денешната одлука за ставање на штрајкот во мирување и продолжување на наставата во основните и средните училишта од утре. Тврдат дека не биле консултирани и прашуваат чиј синдикален лидер е Неделков.
„Вечерва сме спонтано собрани, бидејќи сме изненадени од одлуката на нашиот синдикален лидер, Јаким Неделков, кој постојано нè консултираше и бараше од нас поддршка за одлуките што ги носи. Бидејќи самиот изјави колкав дел од синдикалните оргнизации се изјаснија дека штрајкот треба да продолжи, но денеска се ретерира од таа одлука. Се свикува состанок со Владата без знаење на членството и се носи нова одлука. Сето ова спонтано излезе и се собравме да изразиме револт. Тој е должен е да дојде и да објасни зошто ја промени одлуката“,
изјави една од незадоволните членки на СОНК на вечерашниот протест.
Нејзина колешка, исто така, порача дека се чувствуваат изиграни и изманипулирани од Неделков и порача дека не станува збор за никаков работен спор, па сега да има период на примирје како што претходно изјави Неделков.
„Работен спор би имале кога нашето членство би поднело или би сакало да поднесе тужба до МОН за да ни ги исплати наназад 6-те години кога не се направени усогласувања на нашите плати. Меѓутоа, овде апсолутно не станува збор за никакви тужби, ние не сме во работен спор, ние сме во штрајк. И на нашиот претседател треба да му биде јасно дека иако не сме правници, не сме неписмени. Од таа причина, членството е изреволтирано, собрано и ќе продолжи и понатаму да ги бара своите права“,
рече членката на СОНК.
Таа побара од Неделков и да престане да ги потенцира тие 18 отсто покачување на платите.
„На просветниот работник не му се битни тие, 18-те отсто не беа никаде спомнати во одлуката за штрајк. Наша прва и основна работа заради која тргнавме во штрајк е донесувањето на колективен договор, кој се надевам дека овој нов колективен договор ќе го почитува Владата зошто и претходниот кој постоеше не е испочитуван. Во него се бара патни трошоци како за сите други административци. Се бара за колегите кои работат со децата со инклузија, да се исплати дополнителниот процент кој постои во досегашниот колективен договор …“
рече таа.
И оваа наставничка побара Неделков да излезе пред членството и да објасни, а во спротивно, како што рече, „нека му служи на чест“.
Од изјавите на неколкуте незадоволни членки на СОНК не стана јасно дали, сепак, утре ќе држат настава во училиштата или не. Една од членките порача дека ако мора, би држеле настава и кажа дека и досега децата кои родители ги носеле во училиште биле прифаќани и била организирана настава од нивните колеги кои не се членови на СОНК и не штрајкуваат.
На конкретно прашање до една од наставничките кои протестираа пред седиштето на СОНК, дали лично таа утре ќе држи настава или не, одговори:
„Како и сите денови досега, сме во училиште и доколку дојдат дечиња, ќе бидат прифатени и згрижени. И ако е потребно, ќе држиме и настава, сè додека Неделков не се изјасни конкретно што значи оваа ситуација: штрајкот во мирување и медијација. Бидејќи, како што кажа колешката, спор не постои за да имаме медијација“,
рече наставничката.
Протестот пред седиштето на СОНК следува само неколку часа по изјавата на Неделков дека Советот на СОНК ја донел одлука за мирување на штрајкот и продолжување на наставата во основните училишта од утре.
Одлуката на раководството на Синдикатот дојде откако Министерството за образование и наука (МОН) упати известување до СОНК за мирно решавање на спорот, а повикувајќи се на Законот за мирно решавање на работните спорови, во текот на денешниот ден испрати и барање до Министерството за труд и социјална политика за одредување на помирувач во овој процес.