Претседателот на СОНК во своето обраќање додаде дека ако нема решение штрајкот повторно ќе стане активен
Генералниот штрајк на вработените во основните и средните училишта од денеска се става во мирување. За ова денеска на прес-конференција информира лидерот на Синдикатот за образование, наука и култура (СОНК), Јаким Неделков.
Според тоа, како што посочи тој, наставата во основните и средните училишта во земјава ќе продолжи од утре.
Неделков додаде оти денеска Советот на СОНК расправал во врска со добиеното известување од Министерството за образование и наука за мирно решавање на работните спорови, по што се консултирале со правници и одлучиле штрајкот засега да го стават во мирување додека трае решавањето на спорот во врска со нивните барања за покачување на платите во образовниот и секторот за детска заштита.
„Од денеска генералниот штрајк се става во мирување. Ова е само почитување на законот“,
истакна Неделков.
Претседателот на СОНК во своето обраќање додаде дека ако нема решение за нивните барања штрајкот повторно ќе стане активен, но изрази и уверување дека во текот на преговорите ќе се најдат соодветните решенија и дека нема да има потреба од негово повторно активирање.
„Уште еднаш ќе подвлечам, доколку не се усогласиме со ставовите на ресорното министерство, Министерството за образование и наука, верувајте, сакам да ја уверам јавноста и нашето членство дека штрајкот повторно ќе биде активиран“,
рече лидерот на СОНК, кој изрази надеж дека нема да дојде до тоа и ги повика МОН, МТСП и Владата за изнаоѓање решение за нивните барања.
Во однос на тоа дали ќе се одржи протестот на СОНК најавен за 4 мај, Неделков посочи оти во интерес на подобри предлози од социјалните партнери, протестот нема да се одржи.
„Со оглед на тоа што сега сме во фаза на помирување, би било добро да нема протест, од аспект на тоа да не се врши дополнителен притисок на преговарачите за да на маса на преговори имаме подобри резултати“,
кажа лидерот на СОНК.
Првиот човек на СОНК додаде дека очекува дневниците за време на штрајкот да не бидат скратени, изрази надеж дека платите ќе бидат зголемени, а колективните договори ќе бидат потпишани и утврдени со рокови.
Генералниот штрајк во училиштата и градинките ширум земјава започна на 11 април, со барања од СОНК за зголемување на платите за 18,5 проценти во образовниот и секторот за детска заштита, односно нивно усогласување со минималната плата која од март се зголеми на 18 000 денари и дополнително минималната плата да биде основица со која ќе се множат коефициентите на сложеност на работни места.
Првиот предлог на Владата беше покачување на платите за 10 отсто – предлог кој СОНК категорично го отфрли.
Следниот предлог на Владата беше 12 – процентно зголемување на платите, кое пред два дена СОНК повторно го отфрли, но во интерес на децата, одлучи штрајкот да биде прекинат само во градинките, а во училиштата да продолжи и натаму.